اوچنجيسى: رسالۀِ النورڭ بندن آيريلماسى و بن ده دائرۀِ تنويريه‌سندن اوزاق دوشديگمدن، بو حوالى و أسكيشهر گبى سائر يرلرى ده اونڭ أهمّيتلى و لزوملى بر قسم حقيقتلرندن حصّه‌دار ايتمك ايچون، عنايتِ إلٰهيه، (يڭى يازيلييور گبى) تكرار ايله او قسم حقيقتلرڭ، فقط لطافتلى باشقه طرزلرده ايضاح ايديلمه‌لرنده عادتا إختيارم اولمادن بنى إستعمال ايتديگنى بيلدم، چوق شكر ايتدم
    بو دفعه هديه‌لريڭزه مقابل ألمدن گلسه‌يدى يالڭز مادّى فيآتنه گوره هر بر رساله‌يه اون ليرا و يگرمى بشنجى سوزه يگرمى بش آلتون بلكه ألماس و يگرمى طوقوزنجى سوزه يگرمى طوقوز ياقوت ويرردم. اويله ايسه، ويرلمش گبى قبول ايديڭز. أوت توافقده موفّقيتلى اولان قلمِ عَلوى، كرامتِ عَلويه‌يه گوزه گورونور گوزل بر دليل گوسترمش. يوز بيڭ ما شاء اﷲ. خسروڭ چوق شيرين و فوق العاده يازديغى خسته‌لر لمعه‌سى ايله أسماءِ ستّه لمعه‌سى، بنم نظرمده ألماسله يالديزلى يازيلان و اونلر قدر اوزون ايكى مكتوبِ صداقت مدار حكمنده بڭا گوروندى؛ رسالۀِ النوره چوق أهمّيتلى خدمتلرينى گوز ياشيله خاطرلاتدى و فردوسى هديه‌ڭزده‌كى رساله‌لرڭ حرفلرى عددنجه، جنابِ أرحم الراحمين سزلره رحمت، بركت، سعادت إحسان أيله‌سين. آمين
    يورولماز و اوصانماز جدّى، صميمى حافظ على قارداش! توافقده موفّقيتلى قلمڭ ايله يازيلان إعجازِ قرآنڭ آخرنده سنڭ حقّنده {اَللّٰهُمَّ وَفِّقْهُ فِى خِدْمَةِ الْقُرْاٰنِ وَ اْلاِيمَانِ}  اولان دعا، بو دفعه شبهه‌م قالمادى كه، تام قبول اولمش
    عموم قارداشلره برر برر سلام
سعيد النورسى