بو حادثه مناسبتيله ينه بوگونلرده خاطريمه گلن بر واقعه‌يى بيان ايدييورم:
    بن نماز تسبيحاتنڭ آخرنده، اوتوز اوچ دفعه كلمۀِ توحيدى ذكر ايدركن، بردن قلبمه گلدى كه: حديثِ شريفده ”بعضًا بر ساعت تفكّر، بر سنه عبادت حكمنه گچر“ رسالۀِ النورده او ساعت وار؛ چاليش، او ساعتى بول، إخطار ايديلدى. عادتا إختيارسز بر صورتده، قرآنڭ آيت الكبراسنڭ ايكى تفسيرى اولان ايكى آيتِ كبرا رساله‌لرندن ملخّص تفكّرى بر تكلّم، تام بر ساعت دوام ايتدى. باقدم؛ سزه گوندرديگم آيت الكبرا رساله‌سنڭ برنجى مقامنڭ خلاصه‌سندن منتخب گوزل بر سرّينى خلاصه ايله، يگرمى طوقوزنجى لمعۀِ عربيه‌دن مستخرج نورلى، طاتلى فقره‌لردن تركّب ايدييور. بن، كمالِ لذّتله، هر گون تفكّرله اوقومغه باشلادم. بر قاچ گون صوڭره خاطريمه گلدى كه: مادام رسالۀِ النور بو زمانڭ بر مرشديدر، طلبه‌لرينه بر وردِ أكبر اولابيلير دييه قلمه آلدم. و بتون رساله‌لرڭ خصوصى منبعلرى، معدنلرى اولان بيڭدن زياده آياتِ قرآنيه‌‌يى، كندى قرآنمده أوّلجه إشارتلر قويوب بر حزبِ أعظمِ قرآنى ياپمق نيت ايتمشدم. شيمدى بو حزبِ أعظم و بو وردِ أكبر، رسالۀِ النور منسوبلرينه بعض أيّامِ مباركه‌ده اوقونماسى ايچون بر زمان سزه ده گوندرمك حقّڭز وار. إن شاء اﷲ بر زمان صوڭره سزه گوندريله‌جك. بعض كلمه‌لرينى ترجمه و بر قسم قيدلرينى تفهيم ايچون، وقت بولسه‌م غايت قيصه حاشيه گبى بر شيئى يازاجغم.
    عموم قارداشلريمه و خدمتِ قرآنيه‌ده بتون آرقداشلريمه حسرت و إشتياق ايله بيڭلر سلام.
دعالريڭزه محتاج
 سعيد النورسى