{ظَاهِرِينَ عَلَى الْحَقِّ} (شدّه صاييلير) فقره‌سى دخى؛ مقامِ جفريسى بيڭ بشيوز آلتى (١٥٠٦) ايدوب، بو تاريخه قدر ظاهر و آشكارانه، بلكه غالبانه؛ صوڭره تا قرق ايكى‌يه قدر، گيزلى و مغلوبيت ايچنده وظيفۀِ تنويريه‌سنه دوام ايده‌جگنه رمزه ياقين ايما ايدر. {وَ الْعِلْمُ عِنْدَ اﷲِ ❊ لاَ يَعْلَمُ الْغَيْبَ اِلاَّ اﷲُ}
    {حَتّٰى يَاْتِىَ اﷲُ بِاَمْرِهِ} (شدّه صاييلير) فقره‌سى دخى؛ مقامِ جفريسى بيڭ بشيوز قرق بش (١٥٤٥)  اولوب، كافرڭ باشنده قيامت قوپماسنه ايما ايدر. {لاَ يَعْلَمُ الْغَيْبَ اِلاَّ اﷲُ}
    جاىِ دقّت و حيرتدر كه، اوچ فقره بِالإتّفاق بيڭ بش يوز (١٥٠٠) تاريخنى گوسترملريله برابر، تام تامنه معنيدار، معقول و حكمتلى بر صورتده بيڭ بشيوز آلتيدن تا قرق ايكى‌يه، تا قرق بشه قدر اوچ إنقلابِ عظيمڭ آيرى آيرى زمانلرينه تطابق و توافقلريدر. بو ايمالر گرچه يالڭز برر توافق اولديغندن دليل اولماز و قوّتلى دگل، فقط بردن إخطار ايديلمسى بڭا قناعت ويردى. هم قيامتڭ وقتنى قطعى طرزده كيمسه بيلمز؛ فقط بويله ايمالر ايله بر نوع قناعت، بر غالب إحتمال گله‌بيلير. فاتحه‌ده ”صراطِ مستقيم“ أصحابنڭ طائفۀِ كبراسنى تعريف ايدن {اَلَّذِينَ اَنْعَمْتَ عَلَيْهِمْ} فقره‌سى، شدّه‌سز بيڭ بش يوز آلتى ويا يدى (١٥٠٦-١٥٠٧) ايده‌رك تام تامنه {ظَاهِرِينَ عَلَى الْحَقِّ} فقره‌سنڭ مقامنه توافقى و معناسنه تطابقى و شدّه صاييلسه {لاَ تَزَالُ طَائِفَةٌ مِنْ اُمَّتِى} فقره‌سنه اوچ معنيدار فرقله تام موافقتى و معنًا مطابقتى بو حديثڭ ايماسنى تأييد ايدوب رمز درجه‌سنه چيقارييور. و متعدّد آياتِ قرآنيه‌ده ”صراطِ مستقيم“ كلمه‌سى، بر معناىِ رمزيله رسالة النوره معناجه و جفرجه ايما ايتمه‌سى رمزه ياقين بر ايما ايله؛ رسالة النور شاكردلرينڭ طائفه‌سى، آخر زمانده او طائفۀِ كبراءِ أعظمڭ آخرلرنده بر حزبِ مقبول اولاجغنى إشارت ايدر دييه دفعةً بردن إخطار ايديلدى. {اَلْعِلْمُ عِنْدَ اﷲِ ❊ لاَ يَعْلَمُ الْغَيْبَ اِلاَّ اﷲُ}