بِاسْمِهِ  ❊  وَاِنْ مِنْ شَيْءٍ اِلاَّ يُسَبِّحُ بِحَمْدِهِ
 اَلسَّلاَمُ عَلَيْكُمْ وَ رَحْمَةُ اﷲِ وَ بَرَكَاتُهُ بِعَدَدِ عَاشِرَاتِ دَقَائِقِ عُمْرِكُمْ فِى الدُّنْيَا وَاْلاٰخِرَةِ اٰمِينَ
    عزيز، صدّيق قارداشلرم و خدمتِ قرآنيه‌ده مقتدر، قوّتلى آرقداشلرم!
    بو دفعه مأمولم فوقنده‌كى قلمڭزله معنوى هديه‌ڭز إثبات ايتدى كه: إختيار، ضعيف، عاجز بر سعيد يرينه؛ گنج، قوى، إقتدارلى چوق سعيدلر سزلرده واردر. عين روح، عين إفاده، عين ايمان... حدسز شكر و ثنا اولسون كه؛ ربِّ رحيم سزلرى رسالة النوره حامى، ناشر، صاحب، شاكرد أيله‌مش. بزلره پك چوق آغير مشكلات ايچنده قدسى خدمته موفّقيت إحسان ايتمش. زمان و زمين، سزلر ايله چوق مشتاق اولديغم اوزون قونوشمايى خوش گورمديگى ايچون قيصه كسوب، روح و جانمله هر بريڭزه بيڭلر سلام، ما شاء اﷲ بارك اﷲ ديرم.
بو مبارك شهورِ ثلاثه‌ده دعاڭزه چوق محتاج قارداشڭز سعيد النورسى
* * *
آخر زماندن خبر ويرن مهم بر حديث
لاَ تَزَالُ طَائِفَةٌ مِنْ اُمَّتِى ظَاهِرِينَ عَلَى الْحَقِّ حَتّٰى يَاْتِىَ اﷲُ بِاَمْرِهِ
    رمضانِ شريفده اوننجى گونڭ ايكنجى ساعتنده بردن بو حديثِ شريف خاطريمه گلدى. بلكه رسالۀِ النور شاكردلرينڭ طائفه‌سى نه قدر دوام ايده‌جگنى دوشونديگمه بناءً إخطار ايديلدى. {لاَ تَزَالُ طَائِفَةٌ مِنْ اُمَّتِى} (شدّه صاييلير، تنوين صاييلماز) فقره‌سنڭ مقامِ جفريسى بيڭ بشيوز قرق ايكى (١٥٤٢) ايده‌رك نهايتِ دوامنه ايما ايدر. {لاَ يَعْلَمُ الْغَيْبَ اِلاَّ اﷲُ}