بِاسْمِهِ  ❊  وَاِنْ مِنْ شَيْءٍ اِلاَّ يُسَبِّحُ بِحَمْدِهِ
 اَلسَّلاَمُ عَلَيْكُمْ وَ رَحْمَةُ اﷲِ وَ بَرَكَاتُهُ بِعَدَدِ حُرُوفِ رَسَائِلِ النُّورِ وَمَعَانِيهَا الْمُتَمَثِّلَةِ فِى الْهَوَاءِ وَ فِى اْلاَفْهَامِ اِلٰى يَوْمِ الْقِيَامِ
    عزيز، صدّيق و صادق قارداشلرم!
    بو دفعه پك چوق علاقه‌دار اولديغم ذاتلرڭ درت عدد مكتوبلرى بنى او قدر مسرور ايتدى و رسالۀِ النور حسابنه او قدر ممنون أيلدى كه؛ گويا يڭيدن او قهرمان آرقداشلرى بولدم دييه سُرور ياشلرى چوق حزنلريمى سيلدى. أوت درت مكتوبه درت جواب يازمق ايسترم و حقّڭزدر؛ فقط صميمى إتّحاديڭزه بناءً بر ايله إكتفا ايديلدى. آيرى آيرى بش آلتى كوچك مسئله‌لرى بيان ايدييورم
    برنجيسى: أسكيدن بَرى، ايمان قورتارمق زمانيدر ديديگمز و إختيارم اولمادن تكرار ايله أركانِ ايمانيه‌يه دائر برهانلردن تحشيداتِ عظيمه‌يى ياپديغمز، چوق حقلى و لزوملى اولديغنى زمان گوستردى. سزه بر آى أوّل، معنوى بر محاوره‌ده، رسالۀِ النورڭ عظيم تحشيداتنه دائر غيبدن گلن بر جوابى يازمشدم. بعض ذاتلر او فقره‌يى آيت الكبرا رساله‌سنڭ آخرينه إلحاق ايتديلر
    ايكنجيسى: شاملى توفيق قارداش! سنڭ مكتوبڭ بنى دريندن درينه هم متأثّر هم مفرّح أيلدى. سنده بر خيرلى تحوّلات بولونديغنى إحساس ايتدى
    مرحوم حافظ أحمدڭ أقرباسنه بنم طرفمدن تعزيه ايله برابر دى كه: بر ايكى آى أوّل (بردن بره) دعا ايدركن، أڭ خاص أقربا و أڭ خالص طلبه‌لرڭ دائره‌سنه حافظ أحمد گيردى: ”بنم ده بو دائره‌ده حقّم وار“ ديدى گبى حسّ ايتدم. اونى او خاص دائره ايچنده، هر وقت معنوى قزانجلريمه حصّه‌دار اولمق ايچون بيراقدم و اويله ده قالا‌جق إن شاء اﷲ. و آڭلادم كه؛ ايكيڭز بدايةً، برابر رسالۀِ النوره خدمتڭز ايچوندر. بارلاده بتون دوستلره سلام