اوچنجيسى: صبرى قارداش! قيمتدار خلوصينڭ مكتوبى هم خلوصينڭ، هم بشنجى شعاعڭ أهمّيتنى و قيمتلرينى گوسترديگندن چوق بگندم
    أوت بشنجى شعاع، عمومڭ و بِالخاصّه أهلِ علمڭ ايمانلرينى تصحيح ايدوب قورتارييور
    هم سن، هم خسرو، خليل إبراهيمدن بحث ايدييورسڭز. او ذات، رسالۀِ النورڭ أهمّيتلى بر طلبه‌سى و إقتدارلى بر ناشريدر، هم خاصلردندر. سابق حادثه‌مزدن تام بر إحتياط و جدّى بر علاقه‌دارلق درسنى آلدىغى قناعتنده‌يم. سلاممى اوڭا و رفقاسنه تبليغ ايديڭز.
    دردنجيسى: خسرو قارداش! سنڭ مكتوبڭ، بنم مراقلريمه (حسن، مصطفى‌لر گبى) بر شفا و آرزولريمه بر دوا (معجزاتِ أحمديه گبى) و اميدلريمه بر ضيا (رأفت، قونيالى صبرى گبى) حكمنه گچدى
    هم رسالۀِ النورڭ محترم بر طلبه‌سى و خاص دائره‌سنده بولنان آخرت همشيره‌م والده‌ڭزڭ خسته‌لغى و إختيارلغى سنى إسپارطه‌يه جلبى خيردر. ألبته سن اوڭا، خسته‌لر و إختيارلر رساله‌لرينى اوقومشسڭ. او رساله‌لر، بنم بدلمه اونڭ كيفنى صوروب تسلّى ويرسينلر.
    بن، اوراده‌كى طلبه‌لرى و دوستلرى دعا ايله چوق تخطّر ايدييورم. اونلرى اونوتامييورم. عموم قارداشلريمه برر برر سلام و دعا ايدييورم
سعيد النورسى