تمثيلده‌كى سائر نقطه‌لرى تطبيق ايديڭز، تا او سرّڭ بر خلاصه‌سى گورونسون.
سعيد النورسى
* * *
بِاسْمِهِ سُبْحَانَهُ  ❊  وَاِنْ مِنْ شَيْءٍ اِلاَّ يُسَبِّحُ بِحَمْدِهِ
 اَلسَّلاَمُ عَلَيْكُمْ وَ رَحْمَةُ اﷲِ وَ بَرَكَاتُهُ بِعَدَدِ حُرُوفَاتِ رَسَائِلِ الَّتِى كَتَبْتُمْ وَتَكْتُبُونَ
    عزيز، صدّيق قارداشلرم!
    اوننجى شعاع نامنده، يازديغڭز فهرسته‌نڭ ايكنجى قسمى بڭا شويله قوّتلى بر اُميد ويردى كه: رسالۀِ النور بنم گبى عاجز و إختيار و ضعيف بر بيچاره‌يه بدل، گنج، قوّتلى چوق سعيدلرى ايچيڭزده بولمش و بولاجق. اونڭ ايچون بوندن صوڭره رسالۀِ النورڭ تكميل و ايضاحى و حاشيه‌لرله بيانى و إثباتى سزه توديع ايديلمش تخمين ايدييورم. بر أماره‌سى ده شودر كه؛ بو سنه چوق دفعه إخطار ايديلن حقيقتلرى قيد ايتمك ايچون تشبّث ايتدم ايسه ده چاليشديريله‌مدم
    أوت رسالۀِ النور سزه مكمّل بر مأخذ اولابيلير. و اوندن أركانِ ايمانيه‌نڭ هر بريسنه، مثلا قرآن كلام اﷲ اولديغنه و إعجازى نكته‌لرينه دائر متفرّق رساله‌لرده‌كى پارچه‌لر طوپلانسه ويا حشره دائر آيرى آيرى برهانلر جمع ايديلسه و هكذا.. مكمّل بر ايضاح و بر حاشيه و بر شرح اولابيلير. ظن ايدرم كه، حقائقِ عاليۀِ ايمانيه‌يى تماميله رسالۀِ النور إحاطه ايتمش، باشقه يرلرده آرامغه لزوم يوق. يالڭز بعضًا ايضاح و تفصيله محتاج قالمش. اونڭ ايچون وظيفه‌م بيتمش گبى بڭا گلييور. سزڭ وظيفه‌ڭز دوام ايدييور. و إن شاء اﷲ وظيفه‌ڭز شرح و ايضاحله و تكميل و تحشيه ايله و نشر و تعليم ايله، بلكه يگرمى بشنجى و اوتوز ايكنجى مكتوبلرى تأليف ايله و طوقوزنجى شعاعڭ طوقوز مقامنى تكميل ايله و رسالۀِ النورى تنظيم و ترتيب و تفسير و تصحيح ايله دوام ايده‌جك. رسالۀِ النورڭ صميمى، خالص شاكردلرينڭ هيئتِ مجموعه‌سنڭ قوّتِ إخلاصندن و تساندندن سوزولن و تظاهر ايدن بر شخصِ معنوى، سزه باقى و مقتدر بر قوّتِ ظهردر، بر رهبردر