بوگونلرده تفسيرڭ و اوننجى سوزڭ توافقاتنه باقدم. كندى كنديمه ديدم كه: بو زياده تفصيلات إسرافدر، أهمّيتلى مسئله‌لر چوقدر، وقت ضايع اولماسين. بردن إخطار ايديلدى كه: او توافق آلتنده چوق أهمّيتلى بر مسئله واردر. هم مادام توافقده بر عنايتِ خاصّه و إلتفاتِ رحمانى رسالۀِ النوره قارشى تظاهر ايتمش. او إلتفاته قارشى حسِّ شكران و ممنونيت و متشكّرانه سوينج، نه قدر إفراطكارانه ده اولسه إسراف اولاماز. بو إخطار مجملنى ايكى جهتله ايضاح ايده‌جگم:
    برنجيسى: هر شيده (نه قدر جزئى ده اولسه) بر قصد و إراده‌نڭ جلوه‌سى بولونماسيدر؛ تصادف، حقيقى اولارق اولمامسيدر. أوت كثرتڭ أڭ چوق طاغنيق و أڭ زياده تصادفه ويريلن، كلماتده‌كى حروفاتڭ وضعيتلريدر. خصوصًا كتابتده، مادام هيچ مناسبتى اولميان و إختيارِ بشرى قاريشميان حروفاتڭ وضعيتلرنده بر تناسب، بر نظام بولنويور؛ ألبته بر إرادۀِ غيبى تحتنده وضعيتلر ويريلييور. هيچ بر شى دائرۀِ علم و قدرتندن خارج اولماديغى گبى، دائرۀِ إراده و مشيئتندن دخى خارج دگلدر كه؛ بويله جزئى و طاغنيق شيلرده دخى بر تناسب گوزه‌تيلييور و تنظيم ايديلييور. و او تنظيم ايچنده و إرادۀِ عامّه جلوه‌سنده، بر عنايتِ خاصّه صورتنده، رسالۀِ النوره بر إمتياز نوعنده، خصوصى بر توجّه و إلتفات گورولمش. بن بو درين مسئله‌يى گورمك ايچون، إشارات الإعجاز تفسيرينڭ توافقاتنه دقّت ايتدم؛ قطعى بر قناعت ايله او سرّى بيلدم و حسّ ايتدم.
    ايكنجى جهت: ناصلكه چوق مبارك و قدسى بيوك بر ذات، غايت فقير و محتاج بر آدمه، اُميد ايديلمديگى بر طرزده، إلتفاتكارانه، بر قابده بعض كاغدلره صاريلى بر هديه إحسان ايتسه؛ ألبته او بيچاره آدم، او پك بيوك ذاته قارشى، هديه‌نڭ بيڭلر مِثلندن فضله تشكّر ايتمك ايستر. و بيڭ او هديه قدر قيمتلى بولنان، او هديه ايله گوستريلن إلتفاتنه قارشى، نه قدر تشكّرده إسراف و إفراط ايتسه ده مقبولدر. و او چوق مبارك ذاتڭ او هديه‌سنه صارديغى كاغدلرى ده تبرّك دييوب شكر گبى يه‌سه، حتّى او هديه ايچنده‌كى جويزلرڭ سرت قابوقلرينى ده تبرّك دييه أكمك گبى يوتسه و او هديه‌نڭ قابنى مبارك بر كتاب گبى اوپسه و باشنه قويسه، إسراف اولماديغى گبى؛ عينًا اويله ده، رسالۀِ النور يوزنده إرادۀِ عامّه، عنايتِ خاصّه إلتفاتنى توافق ظرفيله إحسان ايديلمش. ألبته توافقه دائر تفصيلات، تصويرات فعلى تشكّراتڭ بر نوعيدر و سوينجڭ و منّتدارلغڭ هيجانلى ترشّحاتيدر. قصوره باقيلماز. أوت بويله بر ذاتڭ إلتفاتنى گوسترن مادّى قرق پاره إحساننه قارشى قرق بيڭ تشكّر ايديلسه إسراف دگل.