عزيز قارداشلرم! بو صيقنتيلى زمانده و تضييقات آلتنده عقل و قلبى أگلنديرن و كيفلنديرن بويله تفكّهاتِ علميه‌يى إسراف صايمايڭز. حسنِ نيت اويله بر كيميادر كه؛ شيشه‌لرى، ألماسه چويرر؛ طوپراغى، آلتون ياپار. إن شاء اﷲ او حسنِ نيتله، بو تفكّهات دخى حقيقى بر غدا آنبارينه بر آناختار اولور و خدمتده ضعفه دوشنلره قوت و قوّته يول آچار.
    لفظ اللّهڭ آخر حرفى سكسان بش دفعه او لفظه‌'ِ جلالڭ أوّلكى حرفى اولويور. {اَﷲُ وَاحِدٌ} عددينه معنيدار بر تك فرقله توافق لسانيله {اَﷲُ وَاحِدٌ} دير. (هـ) بر عددى، سكسان بش دفعه همان همان عموميتله توافق ايدر. يالڭز بعضًا بر صحيفه فاصله اولور. (هـ) ايكى عددى، قرق ايكى دفعه أكثريتِ مطلقه ايله توافق ايدر. (هـ) اوچ عددى، يگرمى بش دفعه‌در، أكثرى توافقده‌در. هجاده ايكنجى و قرآنده و بسم اﷲده برنجى حرف اولان (ب) ينه سكسان بش دفعه بر اولويور. {اَﷲُ وَاحِدٌ} دير. (ب) ايكى عددى قرق ئوچ اولوب، بر فرقله (هـ) نڭ ايكيسنه توافق ايدر. (ب) اوچ عددى يگرمى يدى اولوب (هـ) نڭ اوچنه ايكى فرقله توافق ايدر. (ت) بش عددى يگرمى اوچ دفعه، (هـ) نڭ اوچ عددينه ايكى فرقله توافق ايدر. (ت) آلتى عددى اون بش دفعه، (و)ڭ درت عددينه توافق ايدر. (و) آلتى عددى يگرمى آلتى ويا يگرمى يدى دفعه‌در. (و)ڭ بش عددى يگرمى بش دفعه اولوب، آلتى عددينه بر ويا ايكى فرقله توافق ايدر. (ألف) آلتى عددى، سكز دفعه و (ألف) بش عددى سكز دفعه بربريله تام توافق ايدر. الحاصل: بش (هـ) ايله آلتى (هُوَ) إسمِ مقدّسى اولدقلرى ايچون كرامتكارانه وضعيتلر گوسترييورلر.
    لفظ اللّهڭ اورته‌ده‌كى حرفى اولان (ل) يتمش بش دفعه أوّلكى حرفى اولان (ألف) اولويور. همان همان عموميتله توافق ايله {هُوَ اﷲُ} عددينه اوچ فرقله توافق لسانيله {هُوَ اﷲُ} اوقويور. لامڭ ايكى عددى آلتمش بش دفعه اولوب، أكثريتِ مطلقه ايله توافق ايده‌رك، فرقسز ويا ايكى فرقله {اﷲ} عددينه توافق لسانيله {اﷲ} دير، ذكر ايدر. و لامڭ اوچ عددى أكثرى بربرينه توافق ايله اوتوز اوچ دفعه اولارق، اوتوز اوچ عددِ مباركنه توافقله و لامڭ مقامِ جفريسنه اوچ فرقله توافق ايتمكله برابر يالڭز معنيدار بر فرقله {وَاحِدٌ اَحَدٌ} عددينه توافق لسانيله {وَاحِدٌ اَحَدٌ} دير، حكم ايدر. لامڭ درت عددى اون سكز اولوب {وَاحِدٌ} عددى اولان اون طوقوزه يالڭز بر معنيدار فرقله، توافق لسانيله {وَاحِدٌ} دير؛ توحيدى إعلان ايدر. بو درت عددى، ايكى عدد ايله برابر، يالڭز ايكى فرقله، توافق ديليله {لاَ إِلٰهَ إِلاَّ هُوَ} اوقورلر.