بو كائناتده، وحدانيتِ إلٰهيه‌يى جنّ و إنس و روحانياته قارشى قطعى بر صورتده گوستروب إثبات ايدن برنجى، قرآنِ عظيم الشان اولديغى گبى؛ بو عصرده ايكنجى، اوچنجى درجه‌ده كمالِ عدالتله و صادق و مصدّق حجّتلرله وحدانيتى واضح و باهر بر صورتده، كائنات صفحاتنده إنس و جنّڭ أنظارينه عرض ايدوب إثبات ايدن رسالۀِ النور؛ بتون طبقاتِ بشره هم مدرسه، هم مكتب، هم قيشله، هم حكيم، هم حاكم اولارق، أڭ عامى عوامدن أڭ أخصِّ خواصّه قدر درس وىروب، تعليم و تربيه ايتمه‌سى بزجه مشهود اولماسيله، بو آيتِ كريمه‌نڭ بر موضوعى، بر ماصدقى ده رسالۀِ النور اولماسنه شبهه‌سز بر قناعت ويريلييور.
    ايكنجى كلمۀِ توحيددن صوڭره {اَلْعَزيِزُ الْحَكِيمُ} إسملريله جنابِ حق (جلّ جلاله) ذاتنى توصيف بيوروب، ايكنجى درجه‌ده عين إسملرڭ مظهرى اولان رسالة النور شخصِ معنويسنه إشارت ايتمه‌سى قرآنِ عظيم الشانڭ شأننه ياقيشير بر كيفيتدر. چونكه بلكه بتون دنيايه مخالف اولارق فقرِ حاليله برابر عزّتِ علميه‌يى محافظه ايچون ئولومدن بتر مصيبتلره قارشى گوگس گرن، تحمّل ايدن رسالۀِ النور ترجمانى اولديغى گبى؛ زمينده و سماواتده حكمتله تصرّفاتڭ معمّاسنى آچان ينه رسالۀِ النور اولديغى صادق و مصدّقدر. بو قوّتلى مناسبتِ معنويه‌يى تأييد ايدن بر أماره‌سى ده شودر كه: {اُولُوا الْعِلْمِ} مقامِ جفريسى ايكى يوز اون درت (٢١٤) اولوب، رسالۀِ النورڭ بر إسمى اولان ”بديع الزمان“ڭ (شدّه‌لى ”ز“، لامِ أصلى صاييلير) مقامى اولان ايكى يوز اون درده تام تامنه توافقى و مؤلّفنڭ حقيقى و دائمى إسمى اولان ملا سعيدڭ مقامى اولان ايكى يوز اون بشه بر تك فرقله توافقى، ألبته بو كلمۀِ قدسيه‌نڭ هر عصره باقديغى گبى، بو عصره ده مدارِ نظر بر فردى رسائل النور اولديغنه بر أماره اولديغى گبى؛ {وَ اُولُوا الْعِلْمِ قَائِمًا بِالْقِسْطِ} (اوقونميان ايكنجى واو و همزه صاييلماز) مقامى اولان آلتى يوز بر (٦٠١) عدديله، رسالۀِ النورڭ بش يوز طقسان طوقوز (٥٩٩) مقامنه و رسائل النور مقامنه يالڭز ايكى فرقله، ايكى إسمنه توافقى دخى بر أماره اولديغى و {شَهِدَ اﷲُ اَنَّهُ لاَ اِلٰهَ اِلاَّ هُوَ وَالْمَلٰئِكَةُ وَاُولُوا الْعِلْمِ} جملۀِ توحيديۀِ قدسيه‌سنڭ مقامِ جفريسى و أبجديسى اولان بيڭ اوچ يوز آلتمش (١٣٦٠) عدديله (حاشيه) تام تامنه بو عجيب عصيان، طغيان و تمرّد عصرينڭ و غريب كفران و غليان و إلحاد زماننڭ بو سنه‌سنه و بولونديغمز بو تاريخه توافقى و تطابقى ألبته قوّتلى بر أماره‌در كه؛ بو پك بيوك و گنيش و عام اولان توحيد و شهادتڭ مدارِ نظر أهمّيتلى أفرادى و ماصدقلرى، هر زماندن زياده بو شهادته محتاج بو عصرڭ بو وقتنده بولنه‌جقدر. و شيمديلك او شهادتى تأثيرلى بر صورتده إثبات ايدن رسائل النور او أفراددن بريسى و خصوصى مدارِ نظر اولديغنه پك چوق أماره‌لر و إشارتلر و بشارتلر واردر. {اَﷲُ اَعْلَمُ بِالصَّوَابِ ❊ وَالْعِلْمُ عِنْدَ اﷲِ}