نور فابريقه‌سنڭ، گل فابريقه‌سنڭ رسالۀِ النوره درجۀِ خدمتلرينى مراق ايدوب صورمشدم. اُميد و تخمينمڭ پك فوقنده اولارق، خسروڭ مكتوبندن، بيڭ قلمله رسالۀِ النوره خدمت خبرينى و بِالخاصّه سزڭ ده يالڭز امّيلردن بر قاچ كويده أللى قلمڭ إمداده يتيشمه‌سى، باقى بر خزينه‌نڭ مژده‌سى قدر بزى ممنون ايتدى. اﷲ سزلردن أبدى راضى اولسون، آمين. و سزى، خدمتِ ايمانيه و قرآنيه‌ده موفّق أيله‌سين، آمين. بيوك حافظ علينڭ، نظيفله توافقى و تطابقى، يالڭز بر ايكى جهتله دگل، چوق جهتلرله مابينلرنده توافق وار.
    عموم قارداشلريمزه برر برر سلام ايدرم.
* * *
    عزيز، صدّيق قارداشلرم!
    سزلرڭ اميديمڭ پك فوقنده غيرت و فعاليتڭز، بنى آخر حياتمه قدر مسرور و متشكّر ايده‌جك بر ماهيتده‌در. بو دفعه مكتوبڭزده، ”حفظِ قرآنه چاليشمق و رسالۀِ النورى يازمق، بو زمانده هانگيسى تقديم ايديلسه داها اييدر؟“ دييه سؤالڭزڭ جوابى بديهيدر. چونكه بو كائناتده و هر عصرده أڭ بيوك مقام قرآنندر. و هر حرفنده، اوندن تا بيڭلر ثواب بولنان قرآنڭ حفظى و قرائتى، هر خدمته مقدَّم و مرجّحدر. فقط رسالۀِ النور دخى، او قرآنِ عظيم الشانڭ حقائقِ ايمانيه‌سنڭ برهانلرى و حجّتلرى اولديغندن و قرآنڭ حفظ و قرائتنه واسطه و وسيله و حقائقنى تفسير و ايضاح اولديغى جهتله، قرآن حفظيله برابر اوڭا چاليشمق ألزمدر.
    نور فابريقه‌سى و گل فابريقه‌سى دوائرنده، مباركلر هيئتنده، لطفيلر نمونه‌لرنده، حاجى حافظلر جماعتنده، صدّيق سليمان، حقّينڭ مقاملرنده بولنان هر بر قارداشلريمزه، خصوصًا أللى اُمّيدن چيقان رسالۀِ النور طلبه‌لرينه برر برر سلام و دعا ايدييورز و دعالريڭزى ايسته‌يورز.
سعيد النورسى