رسالۀِ النورده قطعيتله إثبات ايديلمش كه؛ كفر و ضلالت، كائناته بيوك بر تحقير و موجوداته بر ظلمِ عظيمدر و رحمتڭ رفعنه و آفاتڭ نزولنه وسيله‌در. حتّى دڭز ديبنده باليقلر، جانيلردن شكوا ايدرلر كه؛ ”إستراحتمزڭ سلبنه سبب اولديلر“ دييه روايتِ صحيحه واردر. او حالده كافرڭ عذاب چكمه‌سنه آجييوب شفقت ايدن آدم، شفقته لايق حدسز معصوملره آجيمايور و شفقت ايتمه‌يوب و حدسز مرحمتسزلك ايدييور ديمكدر. يالڭز بو وار كه، مستحقلره آفات گلديگى زمان معصوملر ده يانارلر، اونلره آجيمامق اولمايور. فقط جانيلرڭ جزالرندن ضرر گورن مظلوملرڭ حقّنده گيزلى بر مرحمت وار.
    بر زمان، أسكى حربِ عموميده، دشمنلرڭ أهلِ إسلامه و بِالخاصّه چولوق و چوجقلره ايتدكلرى قتل و ظلملرندن پك چوق متألّم اولويوردم. فطرتمده شفقت و رقّت زياده اولديغندن، تحمّلم خارجنده عذاب چكردم. بردن قلبمه گلدى كه: او مقتول معصوملر شهيد اولوب ولى اولورلر؛ فانى حياتلرى، باقى بر حياته تبديل ايديلييور و ضايع اولان ماللرى صدقه حكمنده اولوب، باقى بر مال ايله مبادله اولور. حتّى او مظلوملر كافر ده اولسه، آخرتده كنديلرينه گوره او دنيوى آفاتدن چكدكلرى بلالره مقابل رحمتِ إلٰهيه‌نڭ خزينه‌سندن اويله مكافاتلرى وار كه؛ أگر پردۀ غيب آچيلسه، او مظلوملر حقلرنده بيوك بر تظاهرِ رحمت گوروب، ”يا ربّى! شكر الحمد ِﷲ“ دييه‌جكلرينى بيلدم و قطعى بر صورتده قناعت گتيردم. و إفراطِ شفقتدن گلن شدّتلى تأثّر و ألمدن قورتولدم.
* * *
    عزيز، صدّيق قارداشلرم!
    سزه بو دفعه ايكى پارچه‌يى گوندرييورم:
    بريسى: أوّلجه بر قسمنى سزه گوندرمشدم. شيمدى بر إخطارِ معنوى ايله او پارچه هم تكميل ايديلدى، هم أهمّيتلى اولديغى بيلديرلدى. أسكى سعيدڭ سياستله مناسبتدار أسكى أثرلرينى گورنلره فائده‌سى وار؛ فقط بر پارچه محرمجه‌در، لاحقه‌يه گيرمه‌لى.
    ايكنجى پارچه: معنوى بر إخطاره بناءً، رسالۀِ النورڭ خدمتنه بيلميه‌رك ضرر ويره‌بيلن بعض يڭى أثرلرى آلان بر قارداشمزى بر ايقاظ، بر إخطاردر كه؛ سائر رسالۀِ النور طلبه‌لرى، وظيفه‌لرينه خلل ويرمه‌مك ايچون بر تنبيهدر. بو ده لاحقه‌يه گيرسين.