خلوصئِ ثالث إمضاسيله أهمّيتلى و بنى چوق مسرور ايدن و كوچك لطفينڭ بر وارثى اولان بر ذاتڭ، رسالۀِ النوره قيمتدار خدمتى و تصاحبنى بيان ايدن بر مكتوبنى آلدم. او ذات كيمدر؟ بن، چوق سلام و دعا ايله اونى تبريك ايدييورم. گل و نور فابريقه‌لرى و مباركلر باشده اولارق، عموم قارداشلريمه برر برر سلام ايدييورم. بو مملكتى تنوير ايدن و جنّت قوقولريله رايحه‌لنديران او فابريقه‌لرى، جنابِ حق موفّق و دائم أيله‌سين، آمين. بز بوراده اونلرڭ پارلاق نورلريله و شيرين گوزل قوقولريله عالمِ بقانڭ رايحه‌سنى إستشمام ايدييورز.
بِاسْمِهِ سُبْحَانَهُ
    رسالۀِ النور طلبه‌لرينڭ خاصلرى اولان صاحب و وارثلرى و خاصلرينڭ خاصلرى اولان أركان و أساسلرى اولان قارداشلريمه بوگونلرده وقوع بولان بر حادثه مناسبتيله بيان ايدييورم كه:
    رسالۀِ النور، حقائقِ إسلاميه‌يه دائر إحتياجلره كافى گلييور، باشقه أثرلره إحتياج بيراقمه‌يور. قطعى و چوق تجربه‌لرله آڭلاشيلمش كه، ايمانى قورتارمق و قوّتلنديرمك و تحقيقى ياپمه‌نڭ أڭ قيصه و أڭ قولاى يولى رسالۀِ النورده‌در. أوت اون بش سنه يرينه، اون بش هفته‌ده رسالۀِ النور او يولى كسديرر، ايمانِ حقيقى‌يه ايصال ايدر. بو فقير قارداشڭز يگرمى سنه‌دن أوّل، كثرتِ مطالعه ايله بعضًا بر گونده بر جلد كتابى آڭلايه‌رق مطالعه ايدركن؛ يگرمى سنه‌ىه ياقيندر كه، قرآن و قرآندن گلن رسائل النور بڭا كافى گلييورلردى. بر تك كتابه محتاج اولمادم، باشقه كتابلرى يانمده بولونديرمادم. رسالۀِ النور چوق متنوّع حقائقه دائر اولديغى حالده، تأليفى زماننده، يگرمى سنه‌دن بَرى بن محتاج اولمادم. ألبته سز، يگرمى درجه داها زياده محتاج اولمامق لازم گلير.
    هم مادام بن سزلره قناعت ايتدم و ايدييورم، باشقه‌لره باقمايورم، مشغول اولمايورم. سز دخى رسالۀِ النوره قناعت ايتمه‌ڭز لازمدر، بلكه بو زمانده ألزمدر.