أوت زمان گوستردى كه؛ حرّيت‌پرور نامنى آلان بر دولتڭ، او إستقبالده گلن إستبدادڭ بر نمونه‌سى اولارق، اوچ يوز مستبد مأمورلريله، اوچ يوز ميليون هندستانى اوچ يوز سنه‌دن بَرى اوچ يوز آدم گبى قولاى باغلايوب تپرنميه‌جك درجه‌ده إستبداد آلتنه آلارق، أشدِّ ظلمى أعظمى بر درجه‌ده، يعنى بريسنڭ خطاسيله بيڭلر آدمى تجزيه ايتمك اولان قانونِ مستبدانه‌سنه إنضباط و عدالت نامنى ويرمش، دنياىى آلداتمش، آتشه ويرمش.
    مناظرات نامنده‌كى أثرده، بعض لطيفه صورتنده بعض قيدلر، حاشيه‌جكلر بولونور. او أسكى زمان تأليفنده ظريف الطبع طلبه‌لرينه بر ملاطفه نوعنده‌در. چونكه اونلر، او طاغلرده برابرنده ايديلر. اونلره درس صورتنده بيان ايدييورمش.
    هم بو مناظرات رساله‌سنڭ روحى و أساسى حكمنده اولان، خاتمه‌سنده‌كى مدرسة الزهرا حقيقتى ايسه، إستقبالده چيقه‌جق اولان رسالۀِ النوره بر بشيك، بر زمين إحضار ايتمك ايدى كه؛ بيلمديگى، إختيارسز اولارق اوڭا سوق اولونويوردى. بر حسِّ قبل الوقوع ايله او نورانى حقيقتى، بر مادّى صورتده آرايوردى. صوڭره او حقيقتڭ مادّى جهتى دخى وجوده گلمگه باشلادى. سلطان رشاد، اون طوقوز بيڭ آلتون ليرايى وانده تملى آتيلان او مدرسة الزهرايه ويردى، تمل آتيلدى. فقط سابق حربِ عمومى چيقدى، گرى قالدى. بش آلتى سنه صوڭره آنقره‌يه گىتدم، ينه او حقيقته چاليشدم. ايكى يوز مبعوثدن يوز آلتمش اوچ مبعوثڭ إمضالريله، او مدرسه‌مز (يوز أللى بيڭ بانقنوطه إبلاغ ايده‌رك) او تخصيصات قبول ايديلدى. فقط بيڭلر تأسّف مدرسه‌لر قپاندى، اونلر ايله اويوشامدم، ينه گرى قالدى. فقط جنابِ أرحم الراحمين او مدرسه‌نڭ معنوى هويتنى إسپارطه ولايتنده تأسيس أيلدى، رسالۀِ النورى تجسّم ايتديردى. إن شاء اﷲ إستقبالده رسالۀِ النور شاكردلرى، او عالى حقيقتڭ مادّى صورتنى ده تأسيس ايتمگه موفّق اولاجقلر.
    أسكى سعيدڭ إتّحاد ترقّى قوميته‌سنه شدّتِ مخالفتى ايله برابر، اونلرڭ حكومتنه و بِالخاصّه اردويه قارشى طرفگيرانه يوكسك تقديراتى و إلتزاملرى ايسه، بر حسِّ قبل الوقوع ايله (ياغى ايچنده بولنان) او جماعتِ عسكريه‌ده و او جمعيتِ ملّيه‌ده بر ميليونه ياقين و أوليا مرتبه‌سنده اولان شهدا، آلتى يدى سنه صوڭره تظاهر ايده‌جگنى حسّ ايتمش. إختيارسز اولارق، مشربنه مخالف اونلره درت سنه طرفگير بولونمش. سابق حربِ عمومى چالقاماسيله او مبارك ياغى آليندى، ياغى آلينمش بر آيرانه دوندى. يڭى سعيد دخى أسكى سعيده مخالفت ايدوب ينه مجاهده‌سنه دوندى