اوچنجى جهت: أگر كُرۀِ أرضڭ درت قطعه‌لرى ايچنده (حاشيه) أڭ كوچگى اولان آوروپانڭ و بو قطعه‌نڭ ده درتده برى اولميان بر حكومتڭ مملكتى؛ أكثر آسيا، آفريقا، آمرىقا، آوستراليا‌يه قارشى غالبانه حرب ايده‌رك حضرتِ عيسى‌نڭ وكالتنى دعوا ايدن بر دولتله برابر دينه إستناد ايدوب چوق مستبدانه اولان دينسزلك جريانلرينه قارشى سماوى پاراشوتلرله محاربه و مجادله ايدن او حكومت ايله اوته‌كيلرڭ شخصِ معنويلرى إنسان صورتنه گيرسه؛ جريده‌لرڭ أسكيدن بَرى ياپدقلرى گبى، دولتلرڭ قوّتلرينى و حكومتلرڭ درجه‌لرينى گوسترمك نوعندن او معنوى شخصلر دخى روىِ زمين جريده‌سنده، بو عصر صحيفه‌سنده برر إنسان صورتنده ترسيم و تصويرلرى گبى تمثّل ايتسه‌لر؛ عينًا و تام تامنه حديثِ شريفڭ معجزانه إخبارِ غيبى نوعندن بيان ايتديگى حادثۀِ آخر زمانڭ متعدّد معنالرندن تام بر معناسى چيقييور. حتّى شخصِ عيسى‌نڭ (ع‌س) سمواتدن نزولى إشارتيله بر معناىِ إشاريسى اولارق، حضرتِ عيسى‌يى (ع‌س) تمثيل ايده‌رك و نامنه حركت ايدن بر طائفه دخى، شيمدى‌يه قدر ايشيديلمه‌مش و گورولمه‌مش بر طرزده طيّاره‌لرله، پاراشوتلرله سمادن بر بلاىِ سماوى گبى نزول ايتديرييور، دشمنلرڭ آرقه‌سنه اينديرييور. حضرتِ عيسى‌نڭ نزولنڭ مادّةً بر مثالنى گوسترييور.
    أوت او حديثِ شريفڭ إفاده‌سيله حضرتِ عيسى‌نڭ سماوى نزولى قطعى اولمقله برابر؛ معناىِ إشاريسيله باشقه حقيقتلرى إفاده ايتديگى گبى، بو حقيقته ده معجزانه إشارت ايدييور. كوچك خسرو اولان فيضى و أمينڭ سؤالى و إلحاحلريله بعض بيچاره‌لرڭ ايمانلرينى شبهاتدن محافظه نيتيله بو مسئله‌يه دائر يالڭز بر ايكى اوچ سطر يازمق نيت ايدوب باشلاركن، إختيارم خارجنده اولارق اوزون يازديرلدى. حكمتنى ده آڭلامادق، بلكه بر حكمتى وار دييه اويله‌جه بيراقدق. قصوره باقمه‌يڭز، بو فقره‌ده تصحيحه و دقّته وقت بولامادق، مشوّش قالدى