بِاسْمِهِ  ❊  وَاِنْ مِنْ شَيْءٍ اِلاَّ يُسَبِّحُ بِحَمْدِهِ
 اَلسَّلاَمُ عَلَيْكُمْ وَ رَحْمَةُ اﷲِ وَ بَرَكَاتُهُ بِعَدَدِ حَاصِلِ ضَرْبِ حُرُوفِ مَا اَرْسَلْتُمْ لَنَا مِنَ الرَّسَائِلِ فِى عَاشِرَاتِ دَقَائِقِ هٰذِهِ اللَّيْلَةِ الرَّغَائِبِ وَ لَيْلَةِ الْمِعْرَاجِ وَلَيْلَةِ الْبَرَاتِ وَلَيْلَةِ الْقَدْرِ وَ اَعْطَاكُمُ اﷲُ بِعَدَدِهَا ثَوَابًا وَحَسَنَاتٍ   اٰمِينَ
    عزيز و صدّيق قارداشلرم و فداكار و صادق آرقداشلرم!
    أوّلا: سزڭ، بو مبارك شهورِ ثلاثه و ايچنده‌كى قيمتدار ليالئِ مباركه‌لرى تبريك ايدييورز. جنابِ حق، هر بر گيجه‌يى سزڭ حقّڭزده برر ليلۀِ رغائب و ليلۀِ قدر قيمتنده سزه ثواب ويرسين، آمين.
    ثانيًا: سزڭ بو دفعه نورلى هديه‌لريڭزڭ هر حرفنه مقابل، جنابِ أرحم الراحمين دفترِ أعمالڭزه بيڭ حسنه يازسين و عاصمڭ روحنه بيڭ رحمت ويرسين، آمين.
    ثالثًا: قرآنِ معجز البيانڭ و رسالۀِ النورڭ خزينه‌لرينڭ كرامتلى و يالديزلى بر آناختارى اولان قلمِ خسروى، الحقّ معجزاتِ أحمديه‌نڭ (ع‌ص‌م) گيزلى گوزللگنى هر گوزه غايت پارلاق و گوزل گوسترييور. جنابِ حق بو قلمى، بو خدمتده موفّق و دائم أيله‌سين، آمين.
    مبارك هيئتنڭ بيوك بر قهرمانى بيوك علينڭ سيستمنده كوچك علينڭ معجزاتِ قرآنيه‌سى، معجزاتِ أحمديه‌نڭ تام مطابق بر باقى پيرلانته طرزنده موقع آلدى. أرحم الراحمين هر حرفنه مقابل يازانه اون ثواب إحسان أيله‌سين، آمين.
    محمد طاهرى، كوچك لطفينڭ خير الخَلَفى و آتابگڭ قهرمانى، بو حوالى‌يه نورلى و گوزل هديه‌لرى چوق قيمتداردر. رحمٰن الرحيم خزينۀِ رحمتندن اوڭا و پدرينه هر حرفنه و هر كلمه‌يه مقابل رحمت ايتسين، آمين.
    آيدينلى حسن علوينڭ قوّتلى قلمى، إن شاء اﷲ مرحوم عاصمڭ نقصان بيراقديغى وظيفۀِ نوريه‌يى تكميل ايده‌جك و او گوزل قلمله عاصمڭ و لطفينڭ روحلرينى شاد ايده‌جك. اونڭ كوچك هديه‌سى، ايلريده‌كى قيمتدار خدمتلرينى إحساس ايده‌رك بيوك بر موقع آلدى. اﷲ اوندن راضى اولسون، آمين.