بِاسْمِهِ سُبْحَانَهُ  ❊  وَاِنْ مِنْ شَيْءٍ اِلاَّ يُسَبِّحُ بِحَمْدِهِ
 اَلسَّلاَمُ عَلَيْكُمْ وَ رَحْمَةُ اﷲِ وَ بَرَكَاتُهُ بِعَدَدِ حُرُوفَاتِ الْقُرْاٰنِ
    عزيز قارداشلرم و صدّيق آرقداشلرم!
    وار اولڭز، بختيار اولڭز! سزڭ پك جدّى سعى و غيرتڭز هم بوراده، هم باشقه يرلرده شوق و غيرتى اويانديرييور. جنابِ حقّه حدسز شكر اولسون كه، گيتدكجه رسالۀِ النورڭ فتوحاتى زياده‌لشيور. أهلِ ايمان ياره‌لرينى حسّ ايدوب، علاجلرينى اوندن بولويورلر.
    حافظ علينڭ مكتوبنده يازديغى ايكى آيتڭ إشارتنه دقّت ايتدك. بزلر دخى نور فابريقه‌سنڭ صاحبى گبى، چوق مسرور و مفرّح اولدق. فقط رسالۀِ النوره بر إشارتِ غيبيله خبر ويرن اوتوز اوچ عدد آيات {شَهِدَ اﷲُ} آيتيله ختام بولديغندن، بو يڭى ايكى آيتڭ مستقل بر صورتده إشارتلرينه قپو آچيلمه‌دى. هم اوتوز اوچ آيتدن هانگيسنڭ تتمّه‌سى اولاجق شيمديلك بيلنمه‌دى. يالڭز بو قدر آڭلاشيلدى كه، {بِاَيْدِى سَفَرَةٍ ❊ كِرَامٍ بَرَرَةٍ} فقره‌سى رسالۀِ النورڭ ناشر و كاتبلرينه معناىِ إشارى ايله باقييور. هم {يَتْلوُا صُحُفًا مُطَهَّرَةً ❊ فِيهَا كُتُبٌ قَيِّمَةٌ} فقره‌سى دخى، رسالۀِ النورڭ أجزالرينه و صحفلرينه و كتابلرينه معناىِ إشاريله باقييور. فقط جفر حسابيله، بيڭ اوچ يوز آلتمش (١٣٦٠) كسوردن صوڭره بو پارلاق وضعيتى گوستره‌جكلر دييه إجمالاً فهم ايتدك.
    گل فابريقه‌سنڭ بزلره پارلاق بر گُلِ محمّدى (ع‌ص‌م) باغچه‌سنى هديه ايده‌جكدى. اونى، بتون روحِ جانمزله بكله‌يورز.
    بو زمانده ِﷲ الحمد سنّتِ سنيه دائره‌سنده كمالِ ايمانى قازانان رسالۀِ النور شاكردلرى أوليالرڭ، مرشدلرڭ نظرِ دقّتنى جلب ايده‌جك وضعيتى آلدىغندن؛ هر زمانده بولنان حقيقى مرشدلر، هر حالده بو زمانده رسالۀِ النور شاكردلرينه مشترى اولورلر. برسنى ألده ايتسه، يگرمى مريد قدر قيمت ويررلر.