هم ذوقلى و جاذبه‌دار ولايت ترشّحاتى قارشيسنده رسالۀِ النورڭ خدمتنده‌كى مشقّت، مجاهده، كلفت بولنديغندن، فيضى‌يه خطابًا بيان ايديلن حقيقت او طرفه ده فائده‌سى اولور دييه لفًّا سزه گوندرلدى.
    عموم قارداشلريمه برر برر سلام ايدييورم.
    فيضى قارداشم!
    سن، إسپارطه ولايتنده‌كى قهرمانلره بڭزه‌مك ايسته‌يورسه‌ڭ تام اونلر گبى اولماليسڭ. حپسخانه‌ده (اﷲ رحمت أيله‌سين) مهم بر شيخ و مرشد و جاذبه‌دار بر نقشى أولياسندن بر ذات، درت آى متماديًا رسالۀِ النورڭ أللى آلتمش شاكردلرى ايچنده جلبكارانه صحبت ايتديگى حالده، يالڭز بر تك شاكردى موقّةً كندينه چكه‌بيلدى. متباقيسى، او جاذبه‌دار شَيخه قارشى مستغنى قالديلر. رسالۀِ النورڭ يوكسك، قيمتدار خدمتِ ايمانيه‌سى اونلره كافى اولارق قناعت ويرييوردى. او شاكردلرڭ غايت كسكين قلب بصيرتى شويله بر حقيقتى آڭلامش كه: رسالۀِ النورله خدمت ايسه، ايمانى قورتارييور؛ طريقت و شيخلك ايسه، ولايت مرتبه‌لرى قزانديرييور. بر آدمڭ ايماننى قورتارمق ايسه، اون مؤمنى ولايت درجه‌سنه چيقارمقدن داها مهم و داها ثوابليدر. چونكه ايمان، سعادتِ أبديه‌يى قزانديرديغى ايچون بر مؤمنه، كُرۀِ أرض قدر بر سلطنتِ باقيه‌يى تأمين ايدر. ولايت ايسه، مؤمنڭ جنّتنى گنيشلتديرر، پارلاتديرر. بر آدمى سلطان ياپمق، اون نفرى پاشا ياپمقدن نه قدر يوكسك ايسه، بر آدمڭ ايماننى قورتارمق، اون آدمى ولى ياپمقدن داها ثوابلى بر خدمتدر.
    ايشته بو دقيق سرّى، سنڭ إسپارطه‌لى قارداشلرڭ بر قسمنڭ عقللرى گورمسه ده عمومنڭ كسكين قلبلرى گورمش كه؛ بنم گبى بيچاره، گناهكار بر آدمڭ آرقداشلغنى أوليالره، بلكه ده أگر بولنسه ايدى، مجتهدلره دخى ترجيح ايتديلر. بو حقيقته بناءً، بو شهره بر قطب، بر غوثِ أعظم گلسه، سنى اون گونده ولايت درجه‌سنه چيقاراجغم ديسه، سن رسالۀِ النورى بيراقوب اونڭ ياننه گيتسه‌ڭ، إسپارطه قهرمانلرينه آرقداش اولامازسڭ.