بِاسْمِهِ سُبْحَانَهُ  ❊  وَاِنْ مِنْ شَيْءٍ اِلاَّ يُسَبِّحُ بِحَمْدِهِ
اَلسَّلاَمُ عَلَيْكُمْ وَ رَحْمَةُ اﷲِ وَ بَرَكَاتُهُ
    سوگيلى و قيمتلى استادم، فضيلت مَاٰب أفنديم حضرتلرى!
    أبدى منّتدارى و خادمى بولنديغم رسالۀِ النورڭ فيضندن، لايق اولمديغم پك چوق ألطافِ ربّانيه‌يه مظهريتمى، گوزلرمدن سوينج ياشلرى آقيتارق گورمكده و نه صورتله شكرانلرمله مقابله ايده‌جگمدن عاجز بولونمقده‌يم. دونڭ منفورِ عموميسى نظيف، بوگونڭ پارلاق بر وطنپرورى ويا حقيقتجيسى بولونمقده‌در. {اَلْحَمْدُ ِﷲِ هٰذَا مِنْ فَضْلِ رَبِّى}  سنه‌لردن بَرى مشتاقى بولنديغم نور و گل فابريقه‌لرى، مباركلر هيئتنڭ و او مقدّس فابريقه‌نڭ ماكينه و چرخلرينڭ نورلى صدالرينى قولاقلرمله ايشيتمك و شو عاجز و قاصر و جاهل وضعيتمله، او يوكسك و عشرۀِ مبشرّۀِ قرآنيه‌دن اولان أصحابِ گزين (رضوان اﷲِ عليهم أجمعين) أفنديلرمزڭ بوگون شخصيتِ معنويه‌لرينى كوچك بر مقياسده تمثيل ايدن صدّيقلر، مجاهدلر، فداكار قهرمانلر جماعتنڭ ايكى مهم عضوى بولنان عزيز قارداشلريمزدن مبارك صبرى و بيوك حافظ علينڭ حقّمده گوستردكلرى عالى جنابانه محبّت و مربوطيتِ قلبيه.. و حادثه‌لرڭ عينًا توافقى، بو يوكسك و مقتدر نور درياسنڭ نورلى روزگارلرندن حاصل اولان طالغه‌لرڭ خيشيرتيلرندن صيزان بر كرامتِ غيبيه بولنديغندن، بزجه پك قيمتدار اولان بو مهم توافقاتڭ، گناهكار و بتون گچمش عمرى عصيانله طولو بو عادى شخصمڭ اويله يوكسك و مقدّس بر هيئتڭ مبارك ايكى عضوى طرفندن حسنِ قبول گوروله‌رك إلتفاتلرينه مظهر و قيمتلى مساعى و خدمتِ قدسيه‌لرينه توافقله، پك جزئى و دگرسز خدمتمزه إشتراك ايده‌رك بنمسه‌مك و قبول ايتمك يوكسكلگنده بولنمه‌لرى، رسالۀِ النورڭ قدسى كرامتيله جنابِ ربِّ عزّتڭ نهايتسز ألطافِ سبحانيه‌سندن بيوك بر لطفِ ربّانى بولونديغنى شكرانله عرض ايدر و بو قيمتلى قارداشلريمزڭ خدمتِ قدسيه‌لرينڭ دڭزندن بر قطره مثابه‌سنده‌كى و چوق خطالى و قيمتسز و جزئى اولان خدمتمزڭ آثارِ فعليه‌سى اولارق، بوگون بنده‌ڭزى لايق بولماديغم حالده، عاجز و جاهل و گناهكار شخصيتم بويله يوكسك و ايريشلمسى محال اولان أصحابِ رسول اﷲ (رضوان اﷲِ عليهم أجمعين) حضراتنڭ شخصيتِ معنويه‌سنڭ كوچك بر جلوه‌سنڭ گولگه‌سنى تمثيل ايدن مباركلر هيئتنڭ ايكى أعضاسنڭ يوكسك إلتفاتلرينه مظهر ايتمشدر كه؛ بنده‌ڭزى بو قدسى مظهريته ايريشديرن رسالۀِ النور دلالتيله قادرِ مطلق و خالقِ ذو الجلاله، رسالۀِ النورڭ حروفاتى و موجوداتڭ مقدارنجه حمد و ثنا ايدر و بو گزيده و قيمتدار مباركلر هيئتنڭ هر بر أعضالرينه و بتون قارداشلريمزه آيرى آيرى إحترامله منّت و شكرانلريمى عرض ايدرم.