أزجمله: متعدّد وجوهندن راديومله آڭلاشيلدى كه: او بر تك آدم بر تك كلمه ايله، بر ميليون كبائرى بردن ايشلر و ميليونلرله إنسانى ديڭلتديرمكله گناهه صوقار. أوت كُرۀِ هوانڭ يوز بيڭلر كلمه‌لرى بردن سويله‌ين و بر ديلى اولان راديو عنصرى، نوعِ بشره اويله بر نعمتِ إلٰهيه‌در كه، كُرۀِ هوايى بتون ذرّاتىله شكر و حمد و ثنا ايله طولديرمق لازم گليركن، ضلالتدن تولّد ايدن سفاهتِ بشريه، او عظيم نعمتى شكرڭ عكسنه إستعمال ايتديگندن ألبته توقات ييه‌جك. ناصلكه خوارقِ مدنيت نامى آلتنده‌كى إحساناتِ إلٰهيه‌يى، بو ميمسز، غدّار مدنيت حسنِ إستعمال ايله شكرينى أدا ايده‌ميه‌رك تخريباته صرف ايدوب كفرانِ نعمت ايتديگى ايچون اويله بر توقات ييدى كه، بتون بتون سعادتِ حياتيه‌يى غيب ايتديردى. و أڭ مدنى تصوّر ايتديگى إنسانلرى، أڭ بدوى و وحشى دركه‌سندن داها آشاغى‌يه اينديردى. جهنّمه گيتمه‌دن أوّل، جهنّم عذابنى طاتديرييور.
    أوت راديونڭ كلّى نعمتيت جهتى، كلّى بر شكر إقتضا ايدر. و او كلّى شكر ده، خالقِ أرض و سماواتڭ كلامِ أزليسنڭ شيمديكى بتون مخاطبلرينه بردن يتيشديرمك ايچون، كلّى يوز بيڭ ديللى سماوى بر حافظ حكمنده، هر وقت كائناتده قرآنى اوقوماليدر. تا او نعمتڭ كلّى شكرينى أدا و او نعمتى إدامه ايتسين.
سعيد النورسى
* * *
    عزيز، صدّيق قارداشلرم!
    سزڭ، يعنى نور فابريقه‌سنڭ صاحبى و مبارك جماعتڭ إمامنڭ آتابگدن گلن مكتوبلرى بزى چوق مسرور أيلدى. اوچ درت آى ظرفنده، اوچ درت كويده امّيلردن أللى عدد قلم رسالۀِ النورى يازمغه موفّق اولمالرى، ألبته عليلرڭ و مصطفى‌لرڭ شبهه‌سز خارقه بر كرامتِ صداقتلريدر. كرامتكارانه بو واقعه، بو حواليده رسالۀِ النور شاكردلرينى چوق قوّتله اُميدلنديردى، زياده شوق ويردى. سزه ده و او اُمّى كاتبلره ده يوز بيڭ بارك اﷲ