صاندقلى طرفنده، كمالِ شوق ايله و جدّيتله فعاليتده بولنان حسن عاطف قارداشمزڭ بر مكتوبندن آڭلادم كه؛ اوراده پرده آلتنده فعاليتنى طورديرمق ايچون، بعض خواجه‌لر، بر قسم طريقته منسوب آدملرى واسطه ايدوب فتور ويرييورلر. حالبوكه مسلگمز، مثبت حركت ايتمكدر. دگل مبارزه، بلكه باشقه‌لرى دوشونمگه ده مسلگمز مساعده ايتمييور. هم مشتريلرى ده آرامغه مجبور دگلز، مشتريلر يالوارملى.
    او قارداشمز، حقيقةً خالص و تام صادق. قلمى گبى، قلبى، روحى ده گوزل. فقط بردن هر شيئى مكمّل ايستر، اونڭ ايچون برآز صيقنتى چكر. ممكن اولديغى قدر هم إحتياط ايتسين، هم ده مبتدع خواجه‌لره مبارزه قپوسنى آچماسين. إن شاء اﷲ جنابِ حق اونى موفّق ايدر. او منطقه‌ده كندى گبى خالص ركنلرى بولور، بلكه ده بولمش. بز باشده اونى و اونڭ أطرافنده‌كى رسالۀِ النور شاكردلرينى تبريك ايدييورز. اونلرڭ آز خدمتلرينه چوق نظريله باقىىورز. بن بورادن اونلرله مخابره و مشاوره ايده‌مديگمدن؛ سزلر بنم بدلمه، او قارداشلريمزه هم سلاممزى، هم معنوى قزانجلريمزه خاصلر دائره‌سنده، عاطفڭ صادق رفقاسى عنوانى آلتنده داخلدرلر. هر صباح يانمزده معنًا بولنويورلر.