عزيز، صدّيق قارداشلرم!
    مرحوم محمد زهدينڭ وفاتى، حقيقةً رسالۀِ النور جهتنده بيوك بر ضايعاتدر. فقط جنابِ حقّه حدسز شكر اولسون كه؛ او مبارك ذات، آز بر زمانده رسالۀِ النوره پك چوق خدمت أيله‌مش. قرق أللى سنه وظيفۀِ نوريه‌سنى، سكز اون سنه‌ده تماميله ياپمش. و معنًا ايچمزده، دائره‌مزده او فوق العاده خدمتيله، پارلاق بر صورتده ياشايور. حسنات جهتنده ئولمه‌مش، دائما دفترِ أعمالنه، داها كثرتلى حسنات يازيلييور.
    حتّى بن ده أسكيده صريح إسميله بر قاچ دفعه، رسالۀِ النور طلبه‌سى عنوانيله يوزر دفعه اونى و اونى رسالۀِ النوره ويرن مرحوم پدرينى معنوى قزانجلريمه شريك ايتديگم گبى؛ شيمدى صريح إسميله بعض گون أللى دفعه‌يه ياقين حصّه‌دار اولويور. ديمك اونڭ حيات قزانجى زياده‌لشمش. جنابِ حق اونڭ أقاربنه صبرِ جميل و اوڭا مغفرتِ كامله إحسان أيله‌سين، آمين.
    او مبارك قلمنى بزه ويرمشدى؛ بن ده اونى، هم عبد الرحمان، هم عبد المجيد يرنده قبول ايتمشدم. اونى وفات ايتمه‌مش گبى، دائما قلمى ايشلر حكمنده قبول ايدييورز. ايكى يوزه ياقين معصوملرى خانه‌سنده قرآنى و رسالۀِ النورى درس ويرن او مبارك ذات، عينًا عبد الرحمان گبى آز زمانده اوزون بر عمرڭ وظيفه‌سنى چابوق گورمش، بيتيرمش گيتمش. قارداشمز كاتب عثمانڭ اونڭ حقّنده يازديغى پارلاق فقره، لاحقه‌يه گيردى. حقيقةً او ذات، او فقره‌يه لايقدر. إن شاء اﷲ إسپارطه‌ده او سيستمده چوقلر داها چيقه‌جق، بو آجى‌يى اونوتديره‌جق. بنم طرفمدن اونڭ والده‌سنى و چوجقلرينى تعزيه ايديڭز.
    رسالۀِ النورڭ غايت أهمّيتلى بر شاكردى اولان خلوصى بگڭ أهمّيتلى بر مكتوبنى گوردم. الحقّ او قارداشمز برنجيلگنى دائما محافظه ايدييور. بن اونى دائما قلم ألنده، رسالۀِ النورڭ ايشى باشنده بيلييورم. هم بتون مخابره‌لرمده برنجى صفده مخاطبدر. اونڭ سؤاللريله يازيلان مكتوبات رساله‌لرى و اونڭ يازديغى صميمى مكتوبلرى، اونڭ يرنده پك چوق إنسانلرى رسالۀِ النور دائره‌سنه جلب ايتمش و ايدييور. او ديديگى گبى، بزدن اوزاق دگل. هر گون، چوق دفعه برابرز. مخابره‌مز هيچ كسيلمه‌مش. سزلرله قونوشديغم وقت خلوصى‌يى ايچنده بولويورم. صبرى، ناصل اونڭ حسابيله بنمله قونوشويور؛ بنم بدلمه ده اونڭله قونوشسون.
عموم قارداشلريمزه برر برر سلام ايدرز.