مسلگمز، سرِّ إخلاصه طيانوب، حقائقِ ايمانيه اولديغى ايچون؛ حياتِ دنيايه، حياتِ إجتماعيه‌يه مجبور اولمادن قارشمه‌مق و رقابت و طرفگيرلگه و مبارزه‌يه سَوق ايدن حالاتدن تجرّد ايتمگه مسلگمز إعتباريله مجبورز. بيڭلر تأسّف كه؛ شيمدى مدهش ييلانلرڭ هجومنه معروض بيچاره أهلِ علم و أهلِ ديانت، سينكلرڭ ايصيرماسى گبى جزئى قصوراتى بهانه ايده‌رك بربرينى تنقيدله ييلانلرڭ و زنديق منافقلرڭ تخريباتلرينه و كنديلرينى اونلرڭ أليله ئولديرمه‌سنه يارديم ايدييورلر. غايت مخلص قارداشمز حسن عاطفڭ مكتوبنده، بر إختيار عالم و واعظ، رسالۀِ النوره ضرر ويره‌جك بر وضعيتده بولونمش. بنم گبى بيڭلر قصورلرى بولنان بر بيچاره‌نڭ، أهمّيتلى ايكى معذرتنه بناءً، بر سنّتى (صقال) ترك ايتديگم بهانه‌سيله شخصمى چوروتوب، رسالۀِ النوره ايليشمك ايسته‌مش.
    أوّلا: هم او ذات، هم سزلر بيليڭز كه: بن، رسالۀِ النورڭ بر خدمتكارى‌يم و او دكّانڭ بر دلاّلى‌يم. او ايسه (رسالۀِ النور)، عرشِ أعظمله باغلى اولان قرآنِ عظيم الشان ايله باغلانمش بر حقيقى تفسيريدر. بنم شخصمده‌كى قصورات، اوڭا سرايت ايده‌مز. بنم ييرتىق دلاّللق ألبسه‌م، اونڭ باقى ألماسلرينڭ قيمتنى تنزيل ايده‌مز.
    ثانيًا: او واعظ و عالم ذاته بنم طرفمدن سلام سويله‌يڭز. بنم شخصمه اولان تنقيدينى، إعتراضنى باشم اوستنه قبول ايدييورم. سزلر ده، او ذاتى و اونڭ گبيلرى مناقشه و مناظره‌يه سَوق ايتمه‌يڭز. حتّى تجاوز ايديلسه ده بددعا ايله ده مقابله ايتمه‌يڭز. كيم اولورسه اولسون، مادام ايمانى وار، او نقطه‌ده قارداشمزدر. بزه دشمنلق ده ايتسه، مسلگمزجه مقابله ايده‌مه‌يز. چونكه داها مدهش دشمن و ييلانلر وار.
    هم ألمزده نور وار، طوپوز يوق. نور كيمسه‌ىى اينجيتمز، ايشيغيله اوقشار. و بِالخاصّه أهلِ علم اولسه، علمدن گلن أنانيتى ده وارسه، أنانيتلرينى تحريك ايتمه‌يڭز. ممكن اولديغى قدر، {وَاِذَا مَرُّوا بِاللَّغْوِ مَرُّوا كِرَامًا} دستورينى رهبر ايديڭز.
    هم، حسن عونى إسمنده‌كى ذات، مادام أوّلجه رسالۀِ النوره گيرمش و يازيسيله ده إشتراك ايتمش، او دائره ايچنده‌در. اونڭ فكرًا بر ياڭليشى وارسه ده عفو ايديڭز. بز، دگل اونلر گبى أهلِ ديانت و طريقته منسوب مسلمانلر، شيمدى بو عجيب زمانده، ايمانى بولنان و حتّى فِرَقِِ ضالّه‌دن بيله اولسه اونلرله اوغراشمامق؛ و اللّٰهى طانييان و آخرتى تصديق ايدن، خرستيان بيله اولسه، اونلرله مدارِ نزاع نقطه‌لرى مدارِ مناقشه ايتمه‌مگى؛ هم بو عجيب زمان، هم مسلگمز، هم قدسى خدمتمز إقتضا ايدييور. و رسالۀِ النورڭ عالمِ إسلامده إنتشارينه قارشى، حياتِ إجتماعيه و سياسيه جهتنده مانعلر چيقمه‌مق ايچون، رسالۀِ النور شاكردلرى مصالحه‌كارانه وضعيتى آلمغه مكلّفدرلر.