اوچنجيسى: مرحوم محمد زهدينڭ وفاتى، رسالۀِ النورڭ خدمتى نقطه‌سنده بزى چوق متأثّر ايتدى. فقط بردن، گچن سنه حافظ محمدڭ بتون مصادره ايديلن رساله‌لرينى، اون گون ظرفنده كوينده‌كى رسالۀِ النور شاكردلرى طرفندن يازوب اوڭا ويرمك، چوق مردانه تعهّدلرى خاطريمه گلدى و آڭلادم كه؛ آرسلانلر ياتاغى اولان إسپارطه و حواليسى، محمد زهدينڭ خدمتنى مضاعف بر صورتده ياپه‌جقلر و او بوشلغى طولديراجقلر.
    دردنجيسى: لاحقه‌يه گيرن إسپارطه‌لى قارداشلريمزڭ مكتوبلرينڭ بعضيلرنده، استادلرى حقّنده إفراط ايله توصيفات گوردم. كنديمه ده باقدم، او وصفلردن زكاتى ده بڭا دوشمييور، بنم حقّم دگل. ديدم: ”عجبا بو حقيقتپرست قارداشلرم چوق ايقاظاتمله برابر، بو حسنِ ظن إفراطنده هم دواملرنده فائده‌لرى نه‌در؟“ قلبه إخطار ايديلدى كه: ”اونلر و مملكتلرى إسپارطه حواليسى، اونلرڭ أڭ بيوك حسنِ ظنلرى درجه‌سنده حسنِ ظنلرينڭ يمننى گوردكلرى ايچون، بش قضالى عثمانِ خالدى و طوپال شكرى گبى أهلِ ولايته إقتداءً، او نقطۀِ نظردن إفراط ايتمه‌مشلر، بر حقيقت گورمشلر. فقط ناصل كشفيات تأويله و رؤيالر تعبيره محتاجدر؛ خصوصى حكملر تعميم ايديلسه، بر جهتده خطا گورونور. اويله ده اونلر، رسالۀِ النورڭ شخصِ معنويسنڭ كنديلرينه و مملكتلرينه ايتديگى فائده‌يى، او شخصِ معنوينڭ ممثّللرندن بريسى اولان استاد ديدكلرى بو قارداشلرينه وىروب، او مملكت حادثه‌سنى عمومى بر حادثه نظريله باقوب تعميم ايده‌رك، مفرطانه بر حسنِ ظن صورتنده گوروندى.“
    بشنجيسى: خاطره گلدى كه، رسالۀِ النورڭ أجزالرى چوقدر. هركس محتاج اولديغى حالده بتوننى ألده ايده‌مز. بردن ”حجّة اﷲ البالغه“ مجموعه‌سى، خاطره جواب اولارق گلدى.
    أوت رسالۀِ النوردن كثرتلى مجموعه‌لر چيقار كه، هر برى كوچك فقط قوّتلى رسالۀِ النور اولور. هر محتاجڭ ألنه گچه‌بيلير. بو مناسبتله، يگرمى بشنجى سوزڭ ذيللرينى دوشوندم. شيمدى بنم يانمده درت بش نسخه وار، ذيلسزدرلر. مباركلرڭ بو دفعه گوندردكلرى نسخه‌نڭ ذيلنده رموزاتِ ثمانيه فهرسته‌سندن نقصان آلينمش سورۀِ {اِذَا جَاءَ نَصْرُ اﷲِ} و {اِنَّا اَعْطَيْنَا} ده‌كى اون اوچ ألف، پارمق ايله و فاتحه‌ده اون اوچ أل ايله إشارتلرى و {اِنَّا اَنْزَلْنَا} إشارتى گبى أهمّيتلى پارچه‌لر يوقدر. دونكى گون  {اَﷲُ نُورُ السَّمٰوَاتِ} آيتنه دائر يگرمى طوقوزنجى مكتوبڭ آخرنده، سياحتِ خياليه و سيرِ قلبى رساله‌جگنى اوقودم. و برنجى شعاعده بو آيت، رسالۀِ النوره إشارتنى تخطّر ايتدم. ديدم: بو ايكى نكتۀِ نوريه و {تَغْرُبُ (الشَّمْسُ) فِى عَيْنٍ حَمِئَةٍ} حجّت، نكته و حاشيه‌سيله برابر معجزۀِ قرآنيه ذيللرى ايچنه گيرسه مناسب اولور. سز دخى مناسب  گورسه‌ڭز يازيلسين. إعجازِ قرآن نكته‌لرينه عائد مهم پارچه بولسه‌ڭز علاوه ايده‌بيليرسڭز.