الحاصل: حافظ علينڭ إخلاصندن گلن إفاده‌سى و خسروى فوق العاده إخلاص نقطه‌سنده تقدير ايتمه‌سى؛ و خسرو ده غايت بيوك و باقى بر حصّه‌سنى بيراقوب بنم أسكيدن بَرى تكرار ايتديگم بر دعوام كه؛ ”رسالۀِ النورڭ حقيقى شاكردلرى خدمتِ ايمانيه‌يى هر شيئڭ فوقنده گورور، قطبيت ده ويريلسه إخلاص ايچون خدمتكارلغى ترجيح ايدر“ بنى او دعواده بِالفعل تصديق ايتمه‌سى جهتندن، بتون قوّتمزله بو گبى قارداشلريمزى تبريك ايدييورز.
    قارداشمز حسن عاطفڭ مكتوبندن آڭلادق كه، حقيقةً تام چاليشييور. كندى تعبيريله، رسالۀِ النورڭ مجاهدلرينڭ و أفه‌لرينڭ قلم يادگارلرينى بزه هديه اولارق إرسال ايتديگنه مقابل، ديرز: جنابِ حق أبدًا اونلردن راضى اولسون. و داها چوق معنيدار يازديغى جمله‌لر ايچنده، بر پارچه أهلِ بدعه‌يه شدّت گوردم. زمان، زمين، رسالۀِ النورڭ مثبت مسلگى، أهلِ بدعه ايله دگل فعلاً، بلكه فكرًا و ذهنًا دخى مشغول اولمغه مساعده ايتمز. إحتياط هر وقت لازم. او خالص قارداشمز، إن شاء اﷲ اورالرده كندى گبى چوق خالص شاكردلرى يتيشديره‌جك. بز بوراده‌كى دعامزده، عاطفله برابر اوراده‌كى بتون رفقالرينى تشريك ايدييورز. بن بِالذّات اونلرله مخابره ايتمك ايسته‌يورم، فقط مادام إسپارطه او وظيفه‌يى داها مكمّل ياپييور. او وظيفه‌يى اونلره بيراقييورم.
    حافظ علينڭ مكتوبنڭ آخرنده، مدرسۀِ نوريه قهرمانلرندن و خسرو سيستمنده أحمد و قارداشى سليمان حقّنده تقديراتى، بزى مسرور أيلدى. ذاتًا او مدرسۀِ نوريه شاكردلرى بنم نظرمده، أسكيدن بَرى بر غايۀِ خيالم اولان مدرسة الزهرانڭ طلبه‌لرى صورتنده دوشونويوردم. و ديردم: ”اونلر بونلر اولدى ويا بونلر اونلرڭ دمدارلريدر.“