آلتنجيسى: سكسان كسور سنه معنوى و باقى بر عمرى قزانديرمق سرّينى طاشيىان شهورِ ثلاثه‌ڭزى و ليلۀِ رغائبڭزى بتون روحمله تبريك ايدييورم. ايكى اوچ گون أوّل، يگرمى ايكنجى سوز تصحيح ايديليركن ديڭله‌دم. گوردم كه؛ ايچنده هم كلّى ذكر، هم گنيش فكر، هم كثرتلى تهليل، هم قوّتلى ايمان درسى، هم غفلتسز حضور، هم قدسى حكمت، هم يوكسك بر عبادتِ تفكّريه گبى نورلر وار. بر قسم شاكردلرڭ عبادت نيتيله رساله‌لرى يا يازمق ويا اوقومق ويا ديڭله‌مكلگڭ حكمتنى بيلدم. بارك اﷲ ديدم، حق ويردم.
    بو مكتوبده‌كى بش آلتى مسئله‌يى يازاركن، نور فابريقه‌سى صاحبى حافظ علينڭ مكتوبيله، إخلاصده و چاليشمقده و اينجه دوشونمكده ممتاز حسن عاطفڭ مكتوبنى آلدق. حافظ علينڭ مكتوبنده، رسالۀِ النور شاكردلرنده سرِّ إخلاصڭ نه درجه يوكسك بر تركِ أنانيت و حظِّ نفسيدن تبرّى ايتمك گبى، إخلاصڭ أڭ يوكسك سجيه‌لرى رسالۀِ النور شاكردلرنده تظاهر ايدييور دييه بر دليل اولدى. أزجمله، حافظ على دييور كه: خسرو قارداشمز كندى قلميله يازيلان ”معجزاتلى قرآنى“ فوطوغرافله طبعنه طرفدار اولمامسى و دمير حرفلرله مساعده اولونجه‌يه قدر بكله‌مگه طرفدار اولماسى، اونڭ فوق العاده إخلاصنه و نفسڭ حظوظاتندن تبرّيسنه قطعى دليلدر. چونكه فوطوغرافله طبع ايديلسه، اونڭ كندى خطّى اولديغى ايچون، بيڭلر قرآن نسخه‌لرينى كندى أليله يازمش گبى عالمِ إسلامڭ معنوى نظرنده و اُخروى ثواب جهتنده بيوك و معصومانه و ضررسز بر مقامى ترك ايدوب إخلاصڭ سرّى ايچون حظّنى اونوته‌رق، دمير حرفلره طرفدار اولمش. و گوسترديگى ياڭليشلر دوشمك سببى ايسه، دمير حرفلرده اوچ دفعه طبعه گيرمك نقطه‌سنده دخى او ياڭليشلر بولنه‌بيلير.