ثانيًا: گل فابريقه‌سى گلستانلرينى و مرحوم بدوى بلبللرينى قونوشديران خسرو قارداش! رسالۀِ النور، إسپارطه‌يى آفاتِ سماويه و أرضيه‌دن محافظه‌سنه سبب اولديغنى چوق حادثاتله برابر، بو يڭى زلزله حادثه‌سى و معارض خواجه‌نڭ طولولرله باشنڭ طوقاتلانماسى، يڭى بر حجّتى اولويور. و معجزاتِ قرآنيه لاحقه‌سنى سزڭ إصابتلى فكرڭزه حواله ايدييورز. هم سز يازديغڭز مقدارى گوندريڭز. بز بوراده تكميل ايدر، سزه ده صوڭره خبر ويررز.
    ثالثًا: نور فابريقه‌سنڭ صاحبى حافظ على قارداش! سنڭ رسالۀِ النوره قارشى خارقه إخلاص و إرتباط و إعتقادڭ، إن شاء اﷲ او نورلرى او حواليده دائما پارلاتديره‌جق. سنڭ، او بيوك زلزله‌نڭ گورولتوسنى ايشيتممه‌ڭ و زلزله‌يى حسّ ايتممه‌ڭ؛ طوقاتنى يين خواجه گبى، رسالۀِ النورڭ بر نوع كرامتيدر. ديمك دگل شاكردلره ضرر ويرمك، بلكه عنايتكارانه، وجودينى ده بعض خاصلره بيلديرمييور، قورقوتمييور.
    رابعًا: بزى و قسطمونى شاكردلرينى قيامته قدر منّتدار ايدن و مستثنا قلميله رسالۀِ النورڭ همان عمومنى بو حوالى‌يه يتيشديرن و أولاد و پدر و والده‌لرى و رفيقه‌سيله رسالۀِ النوره خدمت ايدن قهرمان طاهرى قارداشم! جنابِ حق خانه‌ڭزده‌كى همشيره‌مه، هم بڭا شفا إحسان أيله‌سين. خسته‌لغمه عائد بر پارچه سزه گلييور. پدر و والده‌ڭزه ده بنم طرفمدن ديىڭز كه: ”طاهرى گبى قهرمان بر شاكردى رسالۀِ النوره يتيشديرن و او واسطه ايله دفترِ أعماللرينه دائما حسنات يازديران بر شاكردى بزه قارداش ويرن او مبارك ذاتلر، إن شاء اﷲ بو سعادتى دائما إدامه ايتديره‌جكلر. دنيانڭ جام پارچه‌لرينى، او ألماسلره ترجيح ايتميه‌جكلر. اونلر، خصوصى دعالريمزده داخلدرلر.“
    خامسًا: مجاهدلرڭ استادى و أفه‌لرڭ حقيقى بر ناصحى و رسالۀِ النورڭ خالص مخلص بر شاكردى اولان حسن عاطف قارداشم! سنڭ اوزون و تأثيرلى و أهمّيتلى مكتوبڭ ايچنده‌كى أديبانه، غايت اينجه حسّياتڭ و سڭا مخصوص لطيف تعبيراتڭ خوشمه گيتدى. قارداشم، مبتدعلرڭ و خودفروشلرڭ و ملحدلرڭ ايليشمه‌لرندن تأثّراتڭ بنى، سنڭ حسابڭه متأثّر ايتدى. أوّلجه سزه يازديغم مكتوب، إن شاء اﷲ او تأثّراتى إزاله ايدر. رسالۀِ النورڭ مسلگى ايسه: وظيفه‌سنى ياپار، جنابِ حقّڭ وظيفه‌سنه قاريشماز. وظيفه‌سى، تبليغدر. قبول ايتديرمك، جنابِ حقّڭ وظيفه‌سيدر.