ألماس قلملرينى، بزه يارديم ايچون، يگرمى بر عبد الرحمان و عبد المجيدلرڭ بو قدر چابوق نسخه‌لرى يتيشديرمه‌لرى و قبرى پرنور اولان محمد زهدينڭ، برزخده دخى قلمنى بزم حسابمزه إستعمال ايتمه‌سى حكمنده، اونڭ متروكاتندن نسخه‌لرى گوندريلمه‌سى؛ بزى دريندن درينه سرورله شكره سَوق ايتدى. أسكى طلبه‌لگم زماننده موثوق ذاتلردن، اونلر ده مهم إماملردن نقل ايده‌رك ايشيتدم كه: ”جدّى، مشتاق، خالص طلبۀِ علوم، تحصيلده ايكن وفات ايتدكلرى زمان، برزخده عين تحصيل مثالى و بر مدرسۀِ معنويه‌ده بولنويور گبى؛ او عالمه موافق بر وضعيت إحسان ايديلييور.“ دييه او زمان طلبۀِ علوم ايچنده چوق دفعه مدارِ بحث اولويوردى. شيمدى بو وقتده، طلبۀِ علومڭ أڭ خالصلرى رسالۀِ النور طلبه‌لرى اولديغندن؛ ألبته مرحوم محمد زهدى، عاصم و لطفى گبى ذاتلرڭ وظيفه‌لرى دوام ايدييور. دفترِ أعماللرينه حسنات يازمق ايچون، معنوى قلملرى إن شاء اﷲ ايشله‌يورلر.
    جنابِ حقّه حدسز شكر ايدييورز كه؛ سزده‌كى فوق العاده غيرت و چاليشمق، مطبعه‌يه إحتياج بيراقمه‌يور. بو دفعه گوندرديگڭز رساله‌لر چوق گوزل، چوق مكمّل، چوق ده لزوملى. فقط بن سهو ايتمشدم. اون برنجى لمعه ايله تلويحاتِ تسعه‌يى يازمديغمز حالده، يازمشم ظن ايدييوردم. منهاج السنّه بزده وار. اون بر نكته‌دن عبارت اولان اون برنجى لمعه، مرقات السنّه و تلويحاتِ تسعه ايله و اوڭا ذيل اولارق درت خطوه‌دن عبارت، رسالۀِ قدرڭ ذيلى ايكن اون يدنجى سوزڭ ذيلنه گيرن پارچه دخى تلويحاته ذيل اولارق يازيلسه مناسب اولور.  {اَﷲُ نُورُ السَّمٰوَاتِ وَاْلاَرْضِ} آيتنڭ تجلّيسنه باقان بر سياحتِ قلبيۀِ خياليه‌يه دائر ايكى اوچ صحيفه‌لك يگرمى طوقوزنجى مكتوبڭ آخر قسملرنده‌كى پارچه دخى ايچلرنده بولونسه گوزل اولور.
    شيمدى سزه، مصيبت يوزندن بر عنايتِ خاصّه‌يى، فضله دعا ايتمه‌ڭزه وسيله اولمق ايچون يازييورم:
    بوگون درت ساعت أوّل بن يالڭز، قره طاغڭ خالى اورمانلرى ايچنده ايدم. غايت تيتيز بر آته بينمشدم. بن بينركن بردن ديزگين قاييشى قوپدى. او ده فنا ئوركدى، معركه طاقيلدى. بنى اويله فنا بر طرزده چيفته‌لرله يره دوشوردى. بن او حالده صول أليم و صول آياغم قيريلمش گبى إحتمال ويرديگم گبى، وضعيت ده اويله گوسترييوردى. آت ده باشقه‌سنڭ مالى. او خالى اورمان ايچنه طالدى. أطرافده هيچ كيمسه يوق كه، إمداده يتيشسين. جنابِ حقّه حدسز شكر ايدييورم، أل آياغم قيرلمامش، چوق زياده اينجينمش ايكن ينه شمسيه ايله يورويه‌بيلدم. او تيتيز آت ده اورمانه طالوب، يولسز بر إستقامته، بنم يورويوشمله يورويه‌رك، اون بش دقيقه‌لق بر مسافه‌يه بر ساعتده يتيشدك. آت صو ايچمكده ايكن، نوريه إسمنده بر قادين گلدى. ألنده أكمك، بر پارچه أكمگى آته وىروب، طوتولدى. بن ده جنابِ حقّه شكر، او وقت بينه‌بيلدم، اوطه‌يه گلدم. بردن اويله بر طوفانلى ياغمور اولدى، حجره‌مڭ اوڭنده بر سيل اولارق گوردك. أگر او صو، او نوريه‌يه راست گلمه‌سه ايدى؛ او خالى يرده، او ياغمور آلتنده، آت ده باشقه‌سنڭ مالى، غائب اولمق گبى چوق مصيبتلردن جنابِ حق محافظه أيلدى. بو كوچك مصيبتده طوقوز جهتده نعمت اولديغنى تصديق ايتدك. و بو نوع حفظ و حمايت، سزلرڭ صميمى دعالريڭزڭ بر نتيجه‌سى اولديغى قناعتنده‌يز. و بو طوقوز جهتله مدارِ شكران حادثه، دون آلدىغمز هديۀِ نوريه‌نڭ چوق فائده‌لى اولديغنه إشارتدر. چونكه ضربِ مَثلده مشهوردر كه: بر شيده زحمت و مشقّت، علامتِ مقبوليتدر.
 عموم قارداشلريمزه برر برر سلام و دعا و دعالرينى ايسته‌يورز.