دردنجيسى: سابق اوچ توافقى يازدقدن صوڭره، بيوك حافظ علينڭ غايت گوزل مكتوبيله، خلوصئِ ثالث عبد اﷲ چاوشڭ معنيدار مكتوبى و خلوصى بگڭ و كاتب عثمانڭ قيمتلى مكتوبلرينى آلدم. حافظ علينڭ مكتوبنده يازديغى شو فقره، قونيا عالملرينڭ رسالۀِ النورى يازمقده و تقدير ايتمكده اولدقلرينى و تفسير صاحبى خواجه وهبى‌نڭ (ر ح) رسالۀِ إخلاص قارشيسنده مغلوبيتله برابر، رسالۀِ النوره قارشى حيران و تقديركار اولماسى مناسبتيله، حافظ على ديمش: ”رسالۀِ النورڭ بر كرامتيدر؛ اوكوزه أت و آرسلانه اوت آتماز. اوكوزه اوت ويرر، آرسلانه أت ويرر. او آرسلان خواجه‌نڭ أڭ أوّل إخلاص رساله‌لرى ألنه گچمش.“
    ايشته حافظ علينڭ بو مكتوبنى آلدىغمدن يا آلتى، يا يدى گون أوّل، قره طاغدن اينركن بردن دييوردم: ”ياهو! آته أت، آرسلانه اوت آتما؛ آرسلانه أت، آته اوت وير.“ بو كلمه‌يى بش آلتى دفعه خوشمه گيتمش تكرار ايدييوردم. يا حافظ على بندن أوّل يازمش، بڭا ده سويلتديردى وياخود بن أوّل سويله‌مشم، اوڭا يازديريلمش. يالڭز بو غريب توافقده بر فرقمز وار. او، اوكوزه اوت ديمش؛ بن، آته اوت ديمشم.
* * *
    عزيز، صدّيق قارداشلرم و خدمتِ ايمانيه‌ده قوّتلى، متين، جدّى، صارصيلماز، فداكار آرقداشلرم و سياحتِ برزخيه و اُخرويه‌ده نورانى يولداشلرم!
    سزڭ، هر بر درهمى يوز درهم شهدا قانى قدر قيمتدار سياه نورى آقيتان مبارك قلملريڭزڭ بو دفعه‌كى قدسى هديه‌لرڭ هر بر حرفنه مقابل، جنابِ أرحم الراحمين سزلره بيڭ رحمت أيله‌سين، آمين. بو غفلت و صيقنتيلى و اوصانجلى موسمده و دنيا مشغله‌لرى ايچنده بو فداكارانه غيرتڭز و سعيڭز، حقيقةً بر عنايتِ خاصّه‌در و بر كرامتِ نوريه‌در. جنابِ حق سزلردن أبدًا راضى اولسون، آمين.