هم عدليه‌نڭ بيوك مأمورلرى و تحرّى قوميسرلرى، شدّتلى تحرّى و مصادره ايچون گلدكلرى حالده؛ ألليدن زياده كتابلردن هيچ برينه أل اوزاتمه‌دن، يالڭز او رساله‌لرڭ كرامتلرينى قسمًا ديڭله‌يه‌رك اونلرڭ معنوى حمايتى آلتنده رساله‌لر محافظه ايديلدى. يالڭز مدافعات و اون آلتنجى مكتوب و رمضانيه رساله‌سنى مطالعه ايتمك ايچون بز ويردك. اوچنجى گونده، داها شدّتلى آراما و تحرّى ايتمك، ضابطه‌نڭ سياسى قوميسرى بر تحرّى قوميسريله گلديگى وقتدن ايكى اوچ ساعت أوّل، اوچ كرامتلى رساله‌لرڭ قومانداسنده بتون رساله‌لر كنديلرينى أللره ويرمه‌مك ايچون اورته‌ده گورونمديلر. بتون ايكى ساعت او تحرّى نتيجه‌سنده، آنقره‌دن گلن بر رمضان تبريكيله، بر رمضانيه رساله‌سنى ألده ايتديلر. مطالعه‌دن صوڭره إعاده ايتمك وعديله آلديلر. بتون بو حالات، يوكسكده طوران معجزاتلى قرآنِ عظيم الشان ايله برابر، إعجازلى حزبِ قرآنينڭ نسخه‌لرى و حزبِ نورى‌نڭ رساله‌لرى بو خارقه وضعيتى گوسترديلر. جنابِ حقّه اونلرڭ حروفاتى عددنجه و شهرِ رمضانڭ دقيقه‌لرينڭ عاشره‌لرى صاييسنجه حمد و ثنا ايدييورز. {اَلْحَمْدُ ِﷲِ عَلٰى كُلِّ حَالٍ}.
    هم خسته‌لقدن گلن تأثّر و عاطفڭ حادثه‌سيله قلبمه گلن تألّم و اونلره آجيمق و إسپارطه‌يه سرايت ايتمك أنديشه‌سندن نشئت ايدن صيقنتى و بو مبارك شهرده رسالۀِ النورڭ {سِرًّا تَنَوَّرَتْ} پرده‌سى آلتنه گيرمه‌سى و اوچنجى گونده او ايكى تحرّيدن صوڭره، آقشامه قدر گلن و گيدنلرڭ متماديًا ترصّد ايديلمسى و أمينڭ خانه‌سى ده بر شى بولونمه‌دن تحرّى ايديلمسى جهتيله زياده مضطرب و متألّم ايكن؛ جنابِ أرحم الراحمينڭ رحمتيله، شيمدى‌يه قدر دوام ايدن عنايتِ إلٰهيه حمايتى و رضا، تسليم، توكّل و إخلاصڭ ويردكلرى تسلّى، بتون او مُزعج شيلرى عقيم بيراقدى. كمالِ فرح و إستراحتله ”گوره‌لم مولا نيلر، نيلرسه گوزل أيلر“ دييوب، كمالِ تسليميتله مستريح اولدق. سز ده اويله اولڭز، فتور گتيرمه‌يڭز.
   
    عموم قارداشلريمزه برر برر سلام و دعا ايدرز.
    خسته‌لق دوام ايدييور، فقط تحمّل خارجنده دگل. او مصيبت ده، رسالۀِ النورڭ پارلاق نشرياتنه توقّف ويرمك ايچون ايدى.
قارداشڭز
سعيد النورسى