عزيز، صدّيق قارداشلرم!
    أوّلا: بو مبارك رمضانِ شريفده‌كى دعالر، إخلاص بولونمق شرطيله إن شاء اﷲ مقبولدر. فقط مع التأسّف أكثريتجه رسالۀِ النور شاكردلرينڭ نظرلرينى دنيايه چويرمك و حضورِ قلبى بوزمق ايچون بعض تعرّضلر يوزندن او إخلاص، او حضورِ تام بر درجه زده‌لنير. مراق ايتمه‌يڭز، هر شيئى جنابِ حقّه حواله ايدوب اويله تعرّضلره أهمّيت ويرمه‌يڭ. عاطفه ده يازيڭز، مراق ايتمه‌سين و متأثّر اولماسين. او ده بر قضاءِ إلٰهىدر. إن شاء اﷲ، صاوه حافظ محمدڭ حادثه‌سى گبى رسالۀِ النورڭ لهنه دونه‌جكدر. (حاشيه ١)
    هم عاطفڭ پارلاق خدمتى توقّفه اوغراماسى (حاشيه ٢) و گريله‌مسى؛ و مرحوم محمد زهدى بدوينڭ يوكسك و گنيش خدمتنڭ پرده‌لنمه‌سنى دوشونمسى بنى زياده محزون ايتديگى هنگامده، أليمه بر مكتوب ويريلدى. او مكتوب، او أنديشه‌مى إزاله ايتدى. رسالۀِ النور خدمتنده بر قپو قپانسه، داها مهم قپولر آچىلير، دييه قاعده ينه حكمنى إجرا ايتدى كه؛ صبرى گبى رسالۀِ النورڭ غايت بيوك بر ركننڭ بيوك عموجه‌سى و رسالۀِ النورڭ بر قهرمانى اولان طاهرينڭ أنيشته‌سى و رسالۀِ النورڭ صفِّ أوّلنده و شاكردلرينڭ باشنده بر زمان ناظرلق وظيفه‌سنى گورن و شيمدى‌يه قدر ده رسالۀِ النور حقّنده قلبنى بوزميان بيوك حافظ زهدينڭ صميمى كمالِ صداقت و إخلاصى گوسترن مكتوبيله؛ و خلوصئِ ثالث عبد اﷲ چاوشڭ حاشيه‌سنده تصديقله، بو أسكى و يڭى غيّور قارداشمز بيوك زهدى، رسميته باقميه‌رق، رسالۀِ النورڭ مهم وظيفه‌لرندن اولان معصوملره قرآن درسنى ويرمكله گوسترلدى كه؛ مرحوم زهدى بدوى يرينه، بو بيوك زهدى‌يى يڭى ويرييور. و عاطفڭ توقّفى يرينه، بو مدقّق و مقتدر و خطيب بيوك حافظ زهدى‌يى فعاليته گتيردى. جنابِ حقّه شكر ايدييورز. بوگوندن إعتبارًا، رسالۀِ النورڭ خاص شاكردلرى ايچنده شركتِ معنويۀِ نوريه‌دن حصّه‌دار اولماسنى و إسميله دعايه گيرديگنى سلاممله برابر تبليغ ايديڭز.
* * *