بِاسْمِهِ سُبْحَانَهُ  ❊  وَاِنْ مِنْ شَيْءٍ   اِلاَّ يُسَبِّحُ بِحَمْدِهِ
 اَلسَّلاَمُ عَلَيْكُمْ وَ رَحْمَةُ اﷲِ وَ بَرَكَاتُهُ
    محترم أحمد حمدى أفندى حضرتلرى!
    بر حادثۀِ روحيه‌مى سزه بيان ايدييورم: چوق زمان أوّل ذاتڭز و سزڭ مسلگڭزده‌كى خواجه‌لرڭ ضرورته بناءً رخصته تابع و عزيمتِ شرعيه‌يى بيراقان فكرلر، بنم فكريمه موافق گلمييوردى. بن هم اونلره، هم سڭا حدّت ايدردم. ”نه‌دن عزيمتى ترك ايدوب رخصته تابع اولويورلر؟“ دييه رسالۀِ نورى طوغريدن طوغرى‌يه سزلره گوندرمزدم. فقط اوچ درت سنه أوّل ينه شدّتلى، قلبمه سزى تنقيدكارانه بر تأسّف گلدى. بردن إخطار ايديلدى كه:
    ”بو سنڭ أسكى مدرسه آرقداشلرڭ اولان باشده أحمد حمدى گبى ذاتلر، دهشتلى و شدّتلى بر تخريباته قارشى ”أهون الشر“ دستوريله ممكن اولديغى قدر بر درجه بر قسم وظيفۀِ علميه‌يى، مقدّساتڭ محافظه‌سنه صرف ايدوب، تهلكه‌يى درتدن بره اينديرملرى، اونلرڭ مجبوريتله بعض نقصانلرينه و قصورلرينه إن شاء اﷲ كفّارت اولور“ دييه قلبمه شدّتلى إخطار ايديلدى. بن دخى سزلرى و سزڭ گبيلرينى، او وقتدن بَرى ينه أسكى مدرسه قارداشلرم و درس آرقداشلرم دييه حقيقى اخوّت نظريله باقمغه باشلادم. اونڭ ايچون بنم بو شدّتلى تسمّم خسته‌لغم وفاتمله نتيجه‌لنمسى دوشونجه‌سيله، سزى نورلره بنم بدلمه حقيقى صاحب و حامى و محافظ اولاجغڭزى دوشونه‌رك، اوچ سنه أوّل مكمّل بر طاقم رسالۀِ نورى سزه ويرمك نيّت ايتمشدم. فقط شيمدى هم مكمّل دگل، هم تمامى دگل، فقط أكثريتِ مطلقه أجزالرى نور شاكردلرندن غايت مهمّ اوچ ذاتڭ اون - اونبش سنه أوّل يازدقلرى بر طاقمى سزڭ ايچون، خسته‌لغم ايچنده بر درجه تصحيح ايتدم. بو اوچ ذاتڭ قلمنڭ بنم يانمده اون طاقم قدر قيمتى وار. سندن باشقه بو طاقمى كيمسه‌يه ويرميه‌جكدم. بوڭا مقابل اونڭ معنوى فيآتى ده اوچ شيدر: