برنجيسى: سز ممكن اولديغى قدر ديانت رياستنڭ شعبه‌لرينه ويرمك ايچون؛ ممكنسه أسكى حروف، دگلسه يڭى حرف ايله و خاص آرقداشلرمدن تصحيحه يارديم ايچون بريسى باشده بولونمق شرطيله، مملكتده‌كى ديانت رياستنڭ شعبه‌لرينه يگرمى اوتوز دانه تكثير ايديلمكدر. چونكه خارجى دينسزلك جرياننه قارشى بويله أثرلرى نشر ايتمك، ديانت رياستنڭ وظيفه‌سيدر.
    ايكنجيسى: مادام نور رساله‌لرى مدرسه ماليدر. سز ده مدرسه‌لرڭ هم أساسى، هم باشلرى، هم شاكردلريسڭز؛ اونلر سزڭ حقيقى مالڭزدر. مناسب گورمديگڭز رساله‌يى شيمديلك نشرينى گرى بيراقيرسڭز.
    اوچنجيسى: توافقلى قرآنمز ممكنسه فوطوغراف مطبعه‌سيله طبع ايديلسين كه، توافقده‌كى لمعۀِ إعجازيه گورونسون. هم باشده‌كى توركجه تعريفاتى ايسه؛ او، قرآن ايله برابر طبع ايديلمه‌سين، بلكه آيريجه بر كوچك رساله‌جك اولارق يا توركجه ويا عربى‌يه گوزلجه چويروب اويله‌جه طبع ايديلسين.
❊ ❊ ❊
بِاسْمِهِ سُبْحَانَهُ
 اَلسَّلاَمُ عَلَيْكُمْ وَ رَحْمَةُ اﷲِ وَ بَرَكَاتُهُ اَبَدًا دَائِمًا
    غايت قيمتلى، فداكار نور قهرمانى آغابگمز خسرو أفندى!
    شيمدى بش دفعه‌در ديانت رئيسى نوردن بر طاقمى مصرّانه ايستدى. استاد ده شدّتلى خسته‌لغى ايچنده تصحيح ايدوب (شيمديلك بيتمك اوزره‌در) ديانت رئيسندن اونڭ معنوى فيآتى اولارق اوچ مادّه ايسته‌مش: بريسى: سزڭ خارقه يازديغڭز معجزه‌لى قرآنى فوطوغرافله طبع ايتمك. بو مادّه‌يى قبول ايتمش؛ يالڭز ”باشنده‌كى توركجه تعريفاتى مستقل قالسه، آيرى طبع ايديلسه مناسبدر.“ ديمش. ايشته استاديمز اوڭا يازديغى مكتوبى براىِ معلومات لفًّا سزه گوندرييورز. استاديمز دييور كه: ”هم بر طاقم رسالۀِ نورى، هم ماكينه ايله چيقان مجموعه‌لرى اوڭا گوندرمك و خسرو گبى بو ايشده أڭ زياده علاقه‌دار بر قارداشمزڭ أليله تسليم ايتمك جهتنى مشورتڭزه حواله ايدييور.“ سز ده تام بر مشورتله سزڭ بو مسئله‌ده اورايه گيتمه‌ڭزڭ وجودجه صحّتڭز مساعدسه و فكريڭزه ده موافق ايسه، معيّن بر وقتده عجله اورايه گيدرسڭز و آدرسڭزى بيلديررسڭز. بز ده طاقمى و مجموعه‌لرى سزه آنقره‌يه ألڭزه يتيشديره‌جگز. حتّى سز ايسترسه‌ڭز كندى حسابڭزه، اونلرى مفتيلر نشر ايتمك نيّتيله ديانت رئيسنه ويررسڭز.