امّا ”لوحِ محو إثبات“ ايسه، ثابت و دائم اولان لوحِ محفوظِ أعظمڭ دائرۀِ ممكناتده، يعنى موت و حياته، وجود و فنايه دائما مظهر اولان أشياده متبدّل بر دفترى و يازار بوزار بر تخته‌سيدر كه، حقيقتِ زمان اودر. أوت هر شيئڭ بر حقيقتى اولديغى گبى، زمان ديديگمز، كائناتده جريان ايدن بر نهرِ عظيمڭ حقيقتى دخى ”لوحِ محو إثبات“ده‌كى كتابتِ قدرتڭ صحيفه‌سى و مركّبى حكمنده‌در. {لاَ يَعْلَمُ الْغَيْبَ اِلاَّ اﷲُ}

ايكنجى سؤال: ميدانِ حشر نره‌ده‌در؟

الجواب: {وَ الْعِلْمُ عِنْدَ اﷲِ} خالقِ حكيمڭ هر شيده گوسترديگى حكمتِ عاليه، حتّى تك كوچك بر شيئه، چوق بيوك حكمتلرى طاقماسيله تصريح درجه‌سنده إشارت ايدييور كه: كُرۀِ أرض، سرسريانه، بادِ هوا عظيم بر دائره‌يى چيزمييور. بلكه مهمّ بر شى أطرافنده دونويور و ميدانِ أكبرڭ دائرۀِ محيطه‌سنى چيزييور، گوسترييور و بر مشهرِ عظيمڭ أطرافنده گزوب، محصولاتِ معنويه‌سنى اوڭا دور ايدييور كه؛ ايلريده او مشهرده، أنظارِ ناس اوڭنده گوستريله‌جكدر. ديمك يگرمى بش بيڭ سنه‌يه قريب بر دائرۀِ محيطه‌نڭ ايچنده، روايته بناءً شامِ شريف قطعه‌سى بر چكردك حكمنده اولارق او دائره‌يى طولديره‌جق بر ميدانِ حشر بسط ايديله‌جكدر. كُرۀِ أرضڭ بتون معنوى محصولاتى، شيمديلك پردۀِ غيب آلتنده اولان او ميدانڭ دفترلرينه و ألواحلرينه گوندريلييور و ايلريده ميدان آچيلديغى وقت، سكنه‌سنى ده ينه او ميدانه دوكه‌جك؛ او معنوى محصولاتلرى ده، غائبدن شهادته گچه‌جكدر. أوت كُرۀِ أرض بر تارلا، بر چشمه، بر ئولچك حكمنده اولارق او ميدانِ أكبرى طولديره‌جق قدر محصولات ويرمش و اونى إستيعاب ايده‌جك مخلوقات اوندن آقمش و اونى إملا ايده‌جك مصنوعات اوندن چيقمش. ديمك كُرۀِ أرض بر چكردك و ميدانِ حشر، ايچنده‌كيلرله برابر بر آغاجدر، بر سنبلدر و بر مخزندر. أوت ناصلكه نورانى بر نقطه، سرعتِ حركتيله نورانى بر خط اولور ويا بر دائره اولور. اويله ده: كُرۀِ أرض سرعتلى، حكمتلى حركتيله بر دائرۀِ وجودڭ تمثّلنه و او دائرۀِ وجود محصولاتيله برابر، بر ميدانِ حشرِ أكبرڭ تشكّلنه مداردر. {قُلْ اِنَّمَا الْعِلْمُ عِنْدَ اﷲِ}