اوچنجى مثال: حضرتِ موسى عليه السلامڭ ”يدِ بيضا“ و ”عصا“ معجزه‌سنه نظيره اولارق، اوچ حادثه‌ده بر معجزۀِ أحمديه:

برنجيسى: حضرتِ إمامِ أحمد ابن حنبل، أبى سعيد الخدرى‌دن تخريج و تصحيح ايدر كه: رسولِ أكرم عليه الصلاة والسلام قتاده ابن نعمانه قراڭلقلى، ياغمورلى بر گيجه‌ده بر دگنك ويرر و فرمان ايدر كه: ”سڭا لامبا گبى، اونر آرشين هر طرفده ايشيق ويره‌جك. أويڭه گيتديگڭ زمان، بر سياه شخص گولگه گوره‌جكسڭ. او، شيطاندر. اونى خانه‌ڭدن چيقار، طرد ايت.“ قتاده دگنگى آلير، گيدر. يدِ بيضا گبى ايشيق ويرر. أوينه گيدر؛ او سياه شخصى گورور، طرد ايدر.

ايكنجيسى: بر منبعِ غرائب اولان غزوۀِ كبراىِ بدرده، عُكّاشه ابن المحصن الأسدينڭ مشركلرله دوگوشوركن قلنجى قيريلدى. رسولِ أكرم عليه الصلاة والسلام اوڭا قيلنجه مقابل قالينجه بر دگنك ويردى. ديدى: ”بونڭله حرب ايت.“ بردن دگنك، بِإذْنِ اﷲ اوزون، بياض بر قلنج اولدى. اونڭله حرب ايتدى. حياتى مقدارنجه، تا يمامه حربنده شهيد اولونجه‌يه قدر بويننده طاشيدى. شو حادثه قطعيدر. چونكه عُكّاشه بتون حياتنده اونڭله إفتخار ايتمش و او قلنج ”العون“ ناميله مشهور اولمش. ايشته حضرتِ عُكّاشه‌نڭ إفتخارى و قلنجڭ عون ناميله، قلنجلرڭ فوقنده إشتهارى، شو حادثه‌نڭ ايكى حجّتيدر.

اوچنجيسى: ابن عبد البرّ گبى بر علاّمۀِ عصر و أهلِ تحقيقڭ بيوكلرندن نقل و تصحيح ايدييورلر كه: غزوۀِ اُحُدده رسولِ أكرم عليه الصلاة والسلامڭ خاله‌زاده‌سى اولان عبد اﷲ ابن جحش حرب ايدركن قلنجى قيريلدى. رسولِ أكرم عليه الصلاة والسلام اوڭا بر دگنك ويردى. او دگنك، اونڭ ألنده بر قلنج اولدى. اونڭ ايله حرب ايتدى. او أثرِ معجزه اولان قلنج، باقى قالدى. مشهور ابن سيّد الناس سِيَرنده خبر ويرييور كه: بر زمان صوڭره، عبد اﷲ او قلنجى بُغاَىِ تُرْكى نامنده بر آدمه، ايكى يوز ليرايه صاتدى. ايشته بو ايكى قلنج عصاىِ موسى گبى برر معجزه‌در. فقط عصاىِ موسى، وفاتِ موسى‌دن صوڭره وجهِ إعجازى قالمادى. فقط شونلر باقى قالديلر.