اون اوچنجى إشارت: معجزاتِ أحمديه عليه الصلاة والسلامڭ هم متواتر، هم مثاللرى پك چوق بر نوعى دخى؛ خسته‌لر و ياره‌ليلر نَفَسِ مباركيله شفا بولمالريدر. شو نوع معجزۀِ أحمديه (عليه الصلاة والسلام)، نوعى إعتباريله معنوى متواتردر. جزئياتلرى، بر قسمى دخى معنوى متواتر حكمنده‌در. ديگر قسمى آحادى ايسه ده، علمِ حديثڭ مدقّق إماملرى تصحيح و تخريج ايتدكلرى ايچون، قناعتِ علميه ويرر. بز ده پك چوق مثاللرندن بر قاچ مثالنى ذكر ايده‌جگز:

برنجى مثال: علاّمۀِ مغرب قاضى عِياض، شفاءِ شريفنده، علوى بر عنعنه ايله و متعدّد طريقلرله، رسولِ أكرم عليه الصلاة والسلامڭ خادمى و بر قوماندانى و حضرتِ عُمَرڭ زماننده اوردوىِ إسلامڭ باش قوماندانى و ايرانڭ فاتحى و عشرۀِ مبشّره‌دن اولان حضرتِ سعد ابن أبى وقّاص دييور:

غزوۀِ اُحُدده بن رسولِ أكرم عليه الصلاة والسلامڭ ياننده ايدم. رسولِ أكرم عليه الصلاة والسلام، او گون قوسى قيريلنجه‌يه قدر كفّاره اوقلر آتدى. صوڭره بڭا اوقلرى ويرييوردى. ” آت!“ دييوردى. نصلسز، يعنى اوقڭ اوچماسنه يارديم ايدن قنادلرى اولميان اوقلرى ويرردى. و بڭا أمر ايدردى: ” آت!“ بن ده آتاردم. قنادلى اوقلر گبى اوچاردى، كفّارڭ جسدينه يرلشيردى. او حالده ايكن، قتاده ابن نعمانڭ گوزينه بر اوق إصابت ايتمش، گوزينى چيقاروب، گوزينڭ حدقه‌سى يوزينڭ اوستنه ايندى. رسولِ أكرم عليه الصلاة والسلام مبارك، شفالى أليله اونڭ گوزينى آلوب، أسكى يوواسنه يرلشديروب، ايكى گوزندن أڭ گوزلى اولارق، هيچ بر شى اولمامش گبى شفا بولدى. شو واقعه چوق إشتهار ايتمش. حتّى قتاده‌نڭ بر حفيدى، عُمَر ابن عبد العزيزڭ ياننه گلديگى وقت، كندينى شويله تعريف ايتمش: ”بن اويله بر ذاتڭ حفيدييم كه: رسولِ أكرم عليه الصلاة والسلام اونڭ چيقمش گوزينى يرينه قويوب، بردن شفا بولدى. أڭ گوزل گوز او اولمش.“ دييه، نظم صورتنده (حاشيه) حضرتِ عُمَره سويله‌مش؛ اونڭ ايله كندينى طانيتديرمش.

-----------------------------------------

(حاشيه: اَنَا ابْنُ الَّذِى سَالَتْ عَلَى الْخَدِّ عَيْنُهُ ❊ فَرُدَّتْ بِكَفِّ الْمُصْطَفٰى اَحْسَنَ الرَّدِّ فَعَادَتْ كَمَا كَانَتْ ِلاَوَّلِ اَمْرِهَا ❊ فَيَا حُسْنَ مَا عَيْنٍ وَيَا حُسْنَ مَا رَدٍّ