مكتوبات | اون طوقوزنجى مكتوب | 200
(128-315)

بو پارچه آلتون و ألماس ايله يازيلسه لياقتى وار


أوت سابقًا بحثى گچمش: آووجنده كوچك طاشلرڭ ذكر و تسبيح ايتمه‌سى؛ {وَمَا رَمَيْتَ اِذْ رَمَيْتَ} سرّيله عين آووجنده، كوچوجك طاش و طوپراق، دشمنه طوپ و گلّه حكمنده اونلرى إنهزامه سَوق ايتمه‌سى؛ {وَ انْشَقَّ الْقَمَرُ} نصّى ايله عين آووجنڭ پارمغيله قمرى ايكى پارچه ايتمه‌سى؛ و عين أل، چشمه گبى اون پارمغندن صويڭ آقماسى و بر اوردويه ايچيرمسى؛ و عين أل، خسته‌لره و ياره‌ليلره شفا اولماسى، ألبته او مبارك أل، نه قدر خارقه بر معجزۀِ قدرتِ إلٰهيه اولديغنى گوسترر. گويا أحباب ايچنده او ألڭ آووجى كوچك بر ذكرخانۀِ سبحانيدر كه، كوچوجك طاشلر دخى ايچنه گيرسه، ذكر و تسبيح ايدرلر. و أعدايه قارشى كوچوجك بر جبخانۀِ ربّانيدر كه؛ ايچنه طاش و طوپراق گيرسه، گلّه و بومبا اولور. و ياره‌ليلر و خسته‌لره قارشى كوچوجك بر أجزاخانۀِ رحمانيدر كه، هانگى درده تماس ايتسه درمان اولور. و جلال ايله قالقديغى وقت، قمرى پارچه‌لايوب قاب قوسَيْن شكلنى ويرر؛ و جمال ايله دونديگى وقت، آبِ كوثر آقيتان اون موصلقلى بر چشمۀِ رحمت حكمنه گيرر. عجبا بويله بر ذاتڭ بر تك ألى، بويله عجيب معجزاته مظهر و مدار اولسه؛ او ذاتڭ خالقِ كائنات ياننده نه قدر مقبول اولديغى و دعواسنده نه قدر صادق بولونديغى و او أل ايله بيعت ايدنلر، نه قدر بختيار اولاجقلرى، بداهت درجه‌سنده آڭلاشيلماز مى؟..

سس يوق

مكتوبات