أگر دينيلسه: ناصل بيلييورز كه، كيمسه معارضه ايده‌مدى و معارضه قابل دگل؟

الجواب: أگر معارضه ممكن اولسه ايدى، هر حالده تشبّث ايديله‌جكدى. چونكه معارضه‌يه إحتياج شديد ايدى. زيرا دينلرى، ماللرى، جانلرى، عياللرى تهلكه‌يه دوشويور. معارضه ايديلسه ايدى قورتولورلردى. أگر معارضه ممكن اولسه ايدى، هر حالده معارضه ايده‌جكديلر. أگر معارضه ايديلسه ايدى، معارضه طرفدارلرى كافرلر، منافقلر چوق، هم پك چوق اولديغندن هر حالده معارضه‌يه طرفدار چيقوب إلتزام ايده‌رك، هركسه نشر ايده‌جكلردى. (ناصلكه إسلاميتڭ عليهنده هر شيئى نشر ايتمشلر.) أگر نشر ايتسه ايديلر و معارضه اولسه ايدى؛ هر حالده تاريخلره، كتابلره شعشعه‌لى بر صورتده گچه‌جكدى. ايشته ميدانده بتون تاريخلر، كتابلر؛ هيچ بريسنده مسيلمۀِ كذّابڭ بر قاچ فقره‌سندن باشقه يوقدر. حالبوكه قرآنِ حكيم، يگرمى اوچ سنه متماديًا طمارلره طوقونديره‌جق و عنادى تحريك ايده‌جك بر طرزده ميدان اوقودى. و دير ايدى كه:

”شو قرآنڭ، محمّد الأمين گبى بر اُمّيدن نظيرينى ياپيڭز و گوستريڭز. هايدى بونى ياپامييورسڭز؛ او ذات اُمّى اولماسين، غايت عالم و كاتب اولسون. هايدى بونى ده گتيره‌مييورسڭز؛ بر تك ذات اولماسين، بتون عالملريڭز، بليغلريڭز طوپلانسين، بربرينه يارديم ايتسين.. حتّى گوونديگڭز آلهه‌لريڭز سزه يارديم ايتسين. هايدى بونڭله ده ياپاميه‌جقسڭز؛ أسكيدن يازيلمش بليغ أثرلردن ده إستفاده ايدوب، حتّى گله‌جكلرى ده يارديمه چاغيروب، قرآنڭ نظيرينى گوستريڭز، ياپيڭز. هايدى بونى ده ياپامييورسڭز؛ قرآنڭ مجموعنه اولماسين ده، يالڭز اون سوره‌سنڭ نظيرينى گتيريڭز. هايدى اون سوره‌سنه مقابل حقيقى طوغرى اولارق بر نظيره گتيره‌مييورسڭز؛ هايدى حكايه‌لردن، أصلسز قصّه‌لردن تركيب ايديڭز. يالڭز نظمنه و بلاغتنه نظيره اولسون گتيريڭز. هايدى بونى ده ياپامييورسڭز؛ بر تك سوره‌سنڭ نظيرينى گتيريڭز. هايدى سوره اوزون اولماسين، قيصه بر سوره اولسون نظيرينى گتيريڭز. يوقسه دين، جان، مال، عياللريڭز؛ دنياده ده آخرتده ده تهلكه‌يه دوشه‌جكدر!“