معجزاتِ أحمديه‌نڭ برنجى ذيلى

(اون طوقوزنجى سوز، رسالتِ أحمديه‌يه (ع‌ص‌م) و ذيلى شقِّ قمر معجزه‌سنه دائر اولديغندن؛ مقام مناسبتيله بورايه آلينمشدر.)

”اون درت رشحاتى“ تضمّن ايدن اون دردنجى لمعه‌نڭ

برنجى رشحه‌سى: ربّمزى بزه تعريف ايدن اوچ بيوك، كلّى معرّف وار. بريسى: شو كتابِ كائناتدر كه، بر نبذه شهادتنى اون اوچ لمعه ايله نور رساله‌سندن اون اوچنجى درسدن ايشيتدك. بريسى: شو كتابِ كبيرڭ آيتِ كبراسى اولان خاتم الأنبيا عليه الصلاة والسلامدر. بريسى ده قرآنِ عظيم الشاندر. شيمدى شو ايكنجى برهانِ ناطقى اولان خاتم الأنبيا عليه الصلاة والسلامى طانيمالى‌يز، ديڭله‌ملى‌يز.

أوت او برهانڭ شخصِ معنويسنه باق: سطحِ أرض بر مسجد، مكّه بر محراب، مدينه بر منبر... او برهانِ باهر اولان پيغمبريمز عليه الصلاة والسلام بتون أهلِ ايمانه إمام، بتون إنسانلره خطيب، بتون أنبيايه رئيس، بتون أوليايه سيّد، بتون أنبيا و أوليادن مركّب بر حلقۀِ ذكرڭ سرذاكرى.. بتون أنبيا حياتدار كوكلرى، بتون أوليا طراوتدار ثمره‌لرى بر شجرۀِ نورانيه‌در كه؛ هر بر دعواسنى، معجزاتلرينه إستناد ايدن بتون أنبيا و كرامتلرينه إعتماد ايدن بتون أوليا تصديق ايدوب إمضا ايدييورلر. زيرا او، {لاَ اِِلٰهَ اِلاَ اﷲُ} دير، دعوا ايدر. بتون صاغ و صول، يعنى ماضى و مستقبل طرفلرنده صف طوتان او نورانى ذاكرلر عين كلمه‌يى تكرار ايده‌رك، إجماع ايده‌رك معنًا ”صدقت و بِالحقِّ نطقت“ ديرلر. هانگى وهمڭ حدّى وار كه، بويله حسابسز إمضالرله تأييد ايديلن بر مدّعايه پارمق قاريشديرسين؟