آلتنجى رشحه: ايشته او ذات، بر سعادتِ أبديه‌نڭ مخبرى، مژده‌جيسى و رحمتِ بى‌نهايه‌نڭ كاشفى و إعلانجيسى و سلطنتِ ربوبيتڭ محاسننڭ دلاّلى، سيرجيسى و كنوزِ أسماءِ إلٰهيه‌نڭ كشّافى، گوستريجيسى اولديغندن؛ بويله باقسه‌ڭ (يعنى عبوديتى جهتيله) اونى بر مثالِ محبّت، بر تمثالِ رحمت، بر شرفِ إنسانيت، أڭ نورانى بر ثمرۀِ شجرۀِ خلقت گوره‌جكسڭ. شويله باقسه‌ڭ، (يعنى رسالتى جهتيله) بر برهانِ حق، بر سراجِ حقيقت، بر شمسِ هدايت، بر وسيلۀِ سعادت گورورسڭ. ايشته باق: ناصل برقِ خاطف گبى اونڭ نورى، شرقدن غربى طوتدى و نصفِ أرض و خُمسِ بشر، اونڭ هديۀِ هدايتنى قبول ايدوب حرزِ جان ايتدى. بزم نفس و شيطانمزه نه اولويور كه: بويله بر ذاتڭ بتون دعوالرينڭ أساسى اولان {لاَ اِِلٰهَ اِلاَ اﷲ}ى، بتون مراتبيله برابر قبول ايتمه‌سين؟

يدنجى رشحه: ايشته باق: شو جزيرۀِ واسعه‌ده وحشى و عادتلرينه متعصّب و عنادجى مختلف أقوامى، نه چابوق عادات و أخلاقِ سيّئۀِ وحشيانه‌لرينى دفعةً قلع و رفع ايده‌رك بتون أخلاقِ حسنه ايله تجهيز ايدوب بتون عالمه معلّم و مدنى اُممه استاد أيلدى. باق! دگل ظاهرى بر تسلّط، بلكه عقللرى، روحلرى، قلبلرى، نفسلرى فتح و تسخير ايدييور. محبوبِ قلوب، معلّمِ عقول، مربّئِ نفوس، سلطانِ أرواح اولدى.

سكزنجى رشحه: بيليرسڭ كه: سيغاره گبى كوچك بر عادتى، كوچك بر قَومده بيوك بر حاكم، بيوك بر همّتله آنجق دائمى قالديره‌بيلير. حالبوكه باق بو ذات، بيوك و چوق عادتلرى؛ هم عنادجى، متعصّب بيوك قَوملردن، ظاهرى كوچك بر قوّتله، كوچك بر همّتله، آز بر زمانده رفع ايدوب يرلرينه اويله سجاياىِ عاليه‌يى كه، دم و طمارلرينه قاريشمش درجه‌ده ثابت اولارق وضع و تثبيت أيله‌يور. بونڭ گبى داها پك چوق خارقه إجراآتى ياپييور. ايشته شو عصرِ سعادتى گورمه‌ينلره جزيرة العربى گوزلرينه صوقويورز. هايدى يوزر فيلسوفى آلسينلر، اورايه گيتسينلر، يوز سنه چاليشسينلر. او ذاتڭ، او زمانه نسبةً بر سنه‌ده ياپديغنڭ يوزدن بريسنى عجبا ياپابيليرلر مى؟