برنجيسى: صانعده‌كى وجوب ايله تجرّد.

ايكنجيسى: ماهيتنڭ مباينتيله عدمِ تقيّد.

اوچنجيسى: عدمِ تحيّز ايله عدمِ تجزّيدر.

برنجى سرّ: وجوب و تجرّدڭ حدسز قولايلغه و نهايتسز سهولته سببيت ويرمه‌لرى، غايت درين بر سردر. اونى بر تمثيل ايله فهمه تقريب ايده‌جگز. شويله كه:

وجود مرتبه‌لرى مختلفدر. و وجود عالملرى آيرى آيريدر. آيرى آيرى اولدقلرى ايچون، وجودده رسوخى بولونان بر طبقۀِ وجودڭ بر ذرّه‌سى، او طبقه‌دن داها خفيف بر طبقۀِ وجودڭ بر طاغى قدردر و او طاغى إستيعاب ايدر. مثلا: عالمِ شهادتدن اولان قفاده‌كى خردل قدر قوّۀِ حافظه عالمِ معنادن بر كتبخانه قدر وجودى ايچنه آلير. و عالمِ خارجيدن اولان طيرناق قدر بر آيينه، وجودڭ عالمِ مثال طبقه‌سندن قوجه بر شهرى ايچنه آلير. و او عالمِ خارجيدن اولان او آيينه و او حافظه‌نڭ شعورلرى و قوّۀِ ايجاديه‌لرى اولسه ايدى، بر ذرّه‌جك وجودِ خارجيلرى قوّتيله، او وجودِ معنويده و مثاليده حدسز تصرّفات و تحوّلات ياپابيليرلردى. ديمك وجود رسوخ پيدا ايتدكجه، قوّت زياده‌لشير؛ آز بر شى، چوق حكمنه گچر. خصوصًا وجود رسوخِ تام قزاندقدن صوڭره، مادّه‌دن مجرّد ايسه، قيد آلتنه گيرمزسه؛ او وقت جزئى بر جلوه‌سى، سائر خفيف طبقاتِ وجودڭ چوق عالملرينى چويره‌بيلير.

ايشته {وَ ِﷲِ الْمَثَلُ اْلاَعْلٰى} شو كائناتڭ صانعِ ذو الجلالى، واجب الوجوددر. يعنى: اونڭ وجودى ذاتيدر، أزليدر، أبديدر، عدمى ممتنعدر، زوالى محالدر و طبقاتِ وجودڭ أڭ راسخى، أڭ أساسليسى، أڭ قوّتليسى، أڭ مكمّليدر. سائر طبقاتِ وجود، اونڭ وجودينه نسبةً غايت ضعيف بر گولگه حكمنده‌در. و او درجه وجودِ واجب راسخ و حقيقتلى و وجودِ ممكنات او درجه خفيف و ضعيفدر كه؛ محيى الدينِ عربى گبى چوق أهلِ تحقيق، سائر طبقاتِ وجودى، أوهام و خيال درجه‌سنه اينديرمشلر؛ {لاَ مَوْجُودَ اِلاَّ هُوَ} ديمشلر. يعنى: وجودِ واجبه نسبةً باشقه شيلره وجود دينيلمه‌ملى؛ اونلر، وجود عنواننه لايق دگللردر دييه حكم ايتمشلر.