هم اﷲ، رحمٰن، رحيم، عليم و َلا اِلٰهَ اِلاّ هُوَ ده‌كى هو عدديله برابر ينه نصفيدر. فرق يالڭز درتدر. و هو يرنده قدير ايله برابر، ينه مجموعِ آياتڭ نصفيدر. فرق طوقوزدر. لفظِ جلالڭ مجموعنده‌كى نكته‌لر چوقدر. يالڭز شيمديلك بو نكته ايله إكتفا ايدييورز.

ايكنجى نكته: سوره‌لر إعتباريله‌در. اونڭ دخى چوق نكته‌لرى وار. بر إنتظام، بر قصد و بر إراده‌يى گوسترر بر طرزده توافقاتى واردر.

سورۀِ بقره‌ده، آياتڭ عدديله لفظِ جلالڭ عددى بردر. فرق درتدر كه، اﷲ لفظى يرنده درت هو لفظى وار. مثلا: لاَ اِلٰهَ اِلاَّ هُوَده‌كى هو گبى. اونڭله موافقت تمام اولور. آلِ عمرانده ينه آياتيله لفظِ جلال توافقده‌در، مساويدرلر. يالڭز لفظِ جلال، ايكى يوز طوقوزدر، آيت ايكى يوزدر. فرق طوقوزدر. بويله مزياتِ كلاميه‌ده و بلاغت نكته‌لرنده كوچك فرقلر ضرر ويرمز، تقريبى توافقات كافيدر. سورۀِ نساء، مائده، أنعام اوچينڭ مجموعِ آيتلرى، مجموعنده‌كى لفظِ جلالڭ عددينه توافقده‌در. آيتلرڭ عددى درت يوز آلتمش درت، لفظِ جلالڭ عددى درت يوز آلتمش بر؛ بسم اﷲده‌كى لفظ اﷲ ايله برابر تام توافقده‌در. هم مثلا: باشده‌كى بش سوره‌نڭ لفظِ جلال عددى؛ سورۀِ أعراف، أنفال، توبه، يونس، هودده‌كى لفظِ جلال عددينڭ ايكى مِثليدر. ديمك بو آخرده‌كى بش، أوّلكى بشڭ نصفيدر. صوڭره گلن سورۀِ يوسف، رعد، إبراهيم، حجر، نحل سوره‌لرنده‌كى لفظِ جلال عددى، او نصفڭ نصفيدر. صوڭره سورۀِ إسراء، كهف، مريم، طٰهٰ، أنبيا، حجّ؛ (حاشيه) او نصفڭ نصفنڭ نصفيدر. صوڭره گلن بشر بشر، تقريبًا او نسبتله گيدييور؛ يالڭز بعض كسوراتله فرق وار. اويله فرقلر، بويله مقامِ خطابيده ضرر ويرمز. مثلا: بر قسم يوز يگرمى بر، بر قسمى يوز يگرمى بش، بر قسمى يوز أللى درت، بر قسمى يوز أللى طوقوزدر. صوڭره سورۀِ زخرفدن باشلايان بش سوره؛ او نصفِ نصفِ نصفڭ نصفنه اينييور. سورۀِ نجمدن باشلايان بش؛ او نصفِ نصفِ نصفِ نصفڭ نصفيدر؛ فقط تقريبيدر. كوچك كسوراتڭ فرقلرى، بويله مقاماتِ خطابيه‌ده ضرر ويرمز. صوڭره گلن كوچك بشلر ايچنده، اوچ بشلرڭ يالڭز اوچر عدد لفظِ جلالى وار. ايشته بو وضعيت گوسترييور كه: لفظِ جلالڭ عددينه تصادف قاريشمامش، بر حكمت و إنتظام ايله عددلرى تعيين ايديلمش.

-----------------------------------------

(حاشيه : بو بشر تقسيمات اوزره بر سرّ إنكشاف ايتمشدى. هيچ بريمزڭ خبرى اولمادن شوراده‌كى آلتى سوره قيد اولمش. شبهه‌مز قالمادى كه؛ غائبدن، إختياريمزڭ خارجنده آلتنجيسى گيرمش؛ تا بو نصفيت سرِّ مهمّى غائب اولماسين