بو اوچنجى قسمڭ متباقى مسئله‌لرى ايله دردنجى قسم توافقاته دائر اولديغى ايچون؛ توافقاته دائر اولان فهرسته ايله إكتفا ايديله‌رك، بوراده يازيلمامشلردر. يالڭز دردنجى قسمه عائد بر إخطار ايله اوچنجى نكته يازيلمشدر.

إخطار: لفظِ رسولده‌كى نكتۀِ عظيمه‌نڭ بياننده يوز آلتمش آيت يازيلدى. إشبو آيتلرڭ خاصيتى پك عظيم اولمقله برابر؛ معنا جهتيله بربرينى إثبات و تكميل ايتديگندن، چوق معنيدار اولديغى ايچون، مختلف آياتى حفظ ايتمك ويا اوقومق آرزوسنده بولونانلره بر حزبِ قرآنى اولديغى گبى؛ قرآن كلمه‌سنده‌كى نكتۀِ عظيمه‌نڭ بياننده، آلتمش طوقوز آياتِ عظيمه‌نڭ درجۀِ بلاغتى پك فوق العاده و قوّتِ جزالتى پك علويدر. بو ده ايكنجى بر حزبِ قرآنى اولارق إخوانه توصيه ايديلير. يالڭز قرآن كلمه‌سى، يدى سلسلۀِ قرآنده موجود اولوب، عموم او كلمه‌يى طوتمش، خارج ايكى قالمش. او ايكى ده قرائت معناسنده اولديغندن؛ او خروج، نكته‌يه قوّت ويرمشدر. رسول لفظى ايسه او كلمه ايله أڭ زياده مناسبتدار سوره‌لر ايچنده سورۀِ محمّد ايله سورۀِ فتح اولديغندن، او ايكى سوره‌دن چيقان سلسله‌لره حصر ايتديگمزدن، خارج قالان رسول لفظى شيمديلك درج ايديلمه‌مشدر. وقت مساعده ايتسه، بونده‌كى أسرار يازيله‌جقدر إن شاء اﷲ.

اوچنجى نكته: ”درت نكته“در.

برنجى نكته: لفظ اﷲ، مجموعِ قرآنده ايكى بيڭ سكز يوز آلتى دفعه ذكر ايديلمشدر. بسم اﷲده‌كيلرله برابر لفظِ رحمٰن، يوز أللى طوقوز دفعه؛ لفظِ رحيم، ايكى يوز يگرمى؛ لفظِ غفور، آلتمش بر؛ لفظِ ربّ، سكز يوز قرق آلتى؛ لفظِ حكيم، سكسان آلتى؛ لفظِ عليم، يوز يگرمى آلتى؛ لفظِ قدير، اوتوز بر؛ لاَ اِلٰهَ اِلاَّ هُوَ ده‌كى هو، يگرمى آلتى دفعه ذكر ايديلمشدر. (حاشيه) لفظ اﷲ عددنده چوق أسرار و نكته‌لر وار. أزجمله: لفظ اﷲ و ربدن صوڭره أڭ زياده ذكر ايديلن رحمٰن، رحيم، غفور و حكيم ايله برابر لفظ اﷲ، قرآن آيتلرينڭ نصفيدر. هم لفظ اﷲ و اﷲ لفظى يرنده ذكر ايديلن لفظِ ربّ ايله برابر، ينه نصفيدر. چندان ربّ لفظى سكز يوز قرق آلتى دفعه ذكر ايديلمش، فقط دقّت ايديلسه، بش يوز كسورى اﷲ لفظى يرنده ذكر ايديلمش، ايكى يوز كسورى اويله دگلدر.

-------------------------------------
(حاشيه : قرآنده‌كى آياتڭ مجموعِ عددى ٦٦٦٦ اولماسى و شو صحيفه‌ده مذكور أسماءِ حسنى‌نڭ عددى، ٦ رقميله علاقه‌دار بولونماسى؛ أهمّيتلى بر سرّه إشارت ايدييور. شيمديلك مهمل قالدى.