أوت بو عصرڭ دهشتنه قارشى تقليدى اولان إعتقادڭ إستناد قلعه‌لرى صارصيلمش و اوزاقلاشمش و پرده‌لنمش اولديغندن؛ هر مؤمن، تك باشيله ضلالتڭ جماعتله هجومنه مقاومت ايتديره‌جك غايت قوّتلى بر ايمانِ تحقيقى لازمدر كه طايانه‌بيلسين. رسالۀِ نور بو وظيفه‌يى؛ أڭ دهشتلى بر زمانده و أڭ لزوملى نازك بر وقتده، هركسڭ آڭلايه‌جغى بر طرزده؛ حقائقِ قرآنيه و ايمانيه‌نڭ أڭ درين و أڭ گيزليلرينى، غايت قوّتلى برهانلر ايله إثبات ايده‌رك؛ او ايمانِ تحقيقى‌يى طاشييان خالص و صادق شاكردلرى دخى، بولوندقلرى قصبه و قريه و شهرلرده (خدمتِ ايمانيه إعتباريله) عادتا برر گيزلى قطب گبى، مؤمنلرڭ معنوى برر نقطۀِ إستنادى اولارق، بيلينمه‌دكلرى و گورونمدكلرى و گوروشلمدكلرى حالده، قوّۀِ معنويۀِ إعتقادلرى جسور برر ضابط گبى؛ قوّۀِ معنويه‌يى، أهلِ ايمانڭ قلبلرينه ويروب، مؤمنلره معنًا مقاومت و جسارت ويرييورلر.

أگر بر معنّد طرفندن دينيلسه: ”حضرتِ إمامِ على رضى اﷲ عنه، بو عموم مجازى معنالرى إراده ايتمه‌مش.“ بز ده ديرز كه: فرضا حضرتِ إمامِ على رضى اﷲ عنه إراده ايتمزسه، فقط كلامى دلالت ايدر و قرينه‌لرڭ قوّتيله، إشارى و ضمنى دلالتله معنالرى ايچنه داخل ايدر. هم مادام او مجازى معنا و إشارى مفهوملر حقدر، طوغريدر و واقعه مطابقدر و بو إلتفاته لايقدر و قرينه‌لرى قوّتليدر؛ ألبته حضرتِ إمامِ على رضى اﷲ عنهڭ، بويله بتون إشارى معنالرى إراده ايده‌جك كلّى بر توجّهى فرضا بولونمازسه؛ جلجلوتيه وحى اولمق جهتيله حقيقى صاحبى، حضرتِ إمامِ على رضى اﷲ عنهڭ استادى اولان پيغمبرِ ذى‌شان عليه الصلاة والسلامڭ كلّى توجّهى و استادينڭ استادِ ذو الجلالنڭ إحاطه‌لى علمى اونلره باقار، إراده دائره‌سنه آلير.