مكتوبات | حقيقت چكردكلرى | 676
(675-698)

٤- حشرده بتون ذوى الأرواحڭ إحياسى؛ موت‌آلود بر نوم ايله قيشده اويوشمش بر سينگڭ بهارده إحيا و إنشاسندن قدرته داها آغير اولاماز. زيرا قدرتِ أزليه ذاتيه‌در؛ تغيّر ايده‌مز، عجز تخلّل ايده‌مز، عوائق تداخل ايده‌مز. اونده مراتب اولاماز، هر شى اوڭا نسبةً بردر.


٥- سيورى‌سينگڭ گوزينى خلق ايدن، گونشى دخى او خلق ايتمشدر.


٦- پيره‌نڭ معده‌سنى تنظيم ايدن، منظومۀِ شمسيه‌يى ده او تنظيم ايتمشدر.


٧- كائناتڭ تأليفنده اويله بر إعجاز وار كه؛ بتون أسبابِ طبيعيه فرضِ محال اولارق مقتدر برر فاعلِ مختار اولسه‌لر، ينه كمالِ عجز ايله او إعجازه قارشى سجده ايده‌رك {سُبْحَانَكَ لاَ قُدْرَةَ لَنَا اِنَّكَ اَنْتَ الْعَزِيزُ الْحَكِيمُ} دييه‌جكلردر.


٨- أسبابه تأثيرِ حقيقى ويريلمه‌مش، وحدت و جلال اويله ايستر. لٰكن ملك جهتنده أسباب دستِ قدرته پرده اولمشدر، عزّت و عظمت اويله ايستر. تا نظرِ ظاهرده، دستِ قدرت ملك جهتنده‌كى امورِ خسيسه ايله مباشر گورولمه‌سين.


٩- محلِّ تعلّقِ قدرت اولان هر شيده‌كى ملكوتيت جهتى شفّافدر، نزيهدر.


١٠- عالمِ شهادت، عوالم الغيوب اوستنده تنتنه‌لى بر پرده‌در.


١١- بر نقطه‌يى تام يرنده ايجاد ايتمك ايچون، بتون كائناتى ايجاد ايده‌جك بر قدرتِ غيرِ متناهى لازمدر. زيرا شو كتابِ كبيرِ كائناتڭ هر بر حرفنڭ، باخصوص ذى‌حيات هر بر حرفنڭ، هر بر جمله‌سنه متوجّه برر يوزى، ناظر برر گوزى واردر.


سس يوق

مكتوبات