١٢- مشهوردر كه: هلالِ عيده باقارلردى. كيمسه بر شى گورمدى. إختيار بر ذات يمين ايده‌رك ”هلالى گوردم.“ ديدى. حالبوكه گورديگى هلال دگل، كيرپيگنڭ تقوّس ايتمش بياض بر قيلى ايدى. او قيل نره‌ده؟ قمر نره‌ده؟ حركاتِ ذرّات نره‌ده؟ فاعلِ تشكيلِ أنواع نره‌ده؟

١٣- طبيعت، مثالى بر مطبعه‌در، طابع دگل؛ نقشدر، نقّاش دگل؛ قابلدر، فاعل دگل؛ مسطردر، مصدر دگل؛ نظامدر، ناظم دگل؛ قانوندر، قدرت دگل؛ شريعتِ إراديه‌در، حقيقتِ خارجيه دگل.

١٤- فطرتِ ذى‌شعور اولان وجدانده‌كى إنجذاب و جذبه، بر حقيقتِ جاذبه‌دارڭ جذبه‌سيله‌در.

١٥- فطرت يالان سويله‌مز. بر چكردكده‌كى ميلانِ نُمُوّ دير: ”بن سنبللنه‌جگم، ميوه ويره‌جگم.“ طوغرى سويلر. يمورطه‌ده بر ميلانِ حيات وار. دير: ”پيليچ اولاجغم.“ بِإذْنِ اﷲ اولور. طوغرى سويلر. بر آووج صو، ميلانِ إنجماد ايله دير: ”فضله ير طوته‌جغم.“ متين دمير اونى يالان چيقاراماز؛ سوزينڭ طوغريلغى دميرى پارچه‌لر. شو ميلانلر، إراده‌دن گلن أوامرِ تكوينيه‌نڭ تجلّيلريدر، جلوه‌لريدر.

١٦- قارينجه‌يى أميرسز، آرى‌يى يعسوبسز بيراقميان قدرتِ أزليه؛ ألبته بشرى نبيسز بيراقماز. عالمِ شهادتده‌كى إنسانلره إنشقاقِ قمر، بر معجزۀِ أحمديه (ع‌ص‌م) اولديغى گبى، معراج دخى عالمِ ملكوتده‌كى ملائكه و روحانياته قارشى بر معجزۀِ كبراىِ أحمديه‌در كه؛ نبوّتنڭ ولايتى بو كرامتِ باهره ايله إثبات ايديلمشدر و او پارلاق ذات، برق و قمر گبى ملكوتده شعله‌فشان اولمشدر.