مكتوبات | حقيقت چكردكلرى | 688
(675-698)

٧٧- حقده إتّفاق، أحقده إختلاف اولديغندن؛ بعضًا حق، أحقدن أحقدر؛ حسن، أحسندن أحسندر. هركس كندى مسلگنه ”هو حق“ ديمه‌لى، ”هو الحق“ ديمه‌ملى. وياخود ”هو حسن“ ديمه‌لى، ”هو الحسن“ ديمه‌ملى


٧٨- جنّت اولمازسه، جهنّم تعذيب ايتمز.


٧٩- زمان إختيارلندقجه، قرآن گنجلشييور؛ رموزى توضّح ايدييور. نور، نار گورونديگى گبى؛ بعضًا شدّتِ بلاغت دخى، مبالغه گورونور


٨٠- حرارتده‌كى مراتب، برودتڭ تخللى ايله‌در؛ حُسنده‌كى درجات، قبحڭ تداخلى ايله‌در. قدرتِ أزليه ذاتيه‌در، لازمه‌در، ضروريه‌در؛ عجز تخلّل ايده‌مز، مراتب اولاماز، هر شى اوڭا نسبةً مساويدر.


٨١- شمسڭ فيضِ تجلّيسى اولان تمثالى، دڭزڭ سطحنده و دڭزڭ قطره‌سنده عين هويتى گوسترييور


٨٢- حيات، جلوۀِ توحيددندر، منتهاسى ده وحدت كسب ايدييور


٨٣- إنسانلرده ولى، جمعه‌ده دقيقۀِ إجابه، رمضانده ليلۀِ قدر، أسماءِ حسنى‌ده إسمِ أعظم، عمرده أجل مجهول قالدقجه؛ سائر أفراد دخى قيمتدار قالير، أهمّيت ويريلير. يگرمى سنه مبهم بر عمر، نهايتى معيّن بيڭ سنه عمره مرجّحدر


٨٤- دنياده معصيتڭ عاقبتى، عقابِ اُخروى‌يه دليلدر

سس يوق

مكتوبات