صوڭره قرآنى يڭى بر طرزده (حاشيه) يازمق خصوصنده طلبه‌لره بر وظيفه آچيلدى. حقّى أفندى‌يه ده حصّه ويريلدى. الحقّ او، حصّه‌سنه صاحب چيقدى. بر جزئى گوزل يازدى، فقط دردِ معيشت ضرورتيله كندينى مجبور بيلوب گيزلى دعوا وكالتنه تشبّث ايتدى. بردن بر شفقت طوقادى داها يدى. قلمى طوتان پارمغى، موقّةً قيريلدى. بو پارمقله هم دعوا وكالتى ياپمق، هم قرآنى يازمق اولميه‌جق دييه، لسانِ معنا ايله إخطار ايديلدى. دعوا وكالتنه تشبّثنى بيلمديگمز ايچون پارمغنه حيرت ايدييوردق. صوڭره آڭلاشيلدى كه: قدسى، صافى خدمتِ قرآنيه، غايت تميز كندينه مخصوص پارمقلرى باشقه ايشه قاريشديرمق ايسته‌مييور. هر نه ايسه... خلوصى بگى كندم گبى بيلدم، اوڭا بدل قونوشدم. حقّى أفندى ده عينًا اونڭ گبيدر. أگر بنم وكالتمه راضى اولمازسه، كندى طوقادينى كندى يازسين.

آلتنجيسى: بكر أفنديدر. شيمدى حاضر اولماديغى ايچون؛ بن، قارداشم عبد المجيده وكالت ايتديگم گبى، اونڭ إعتماد و صداقتنه إعتمادم و شاملى حافظ و سليمان أفندى گبى بتون خاص دوستلريمڭ حكملرينه (بيلدكلرينه) إستنادًا دييورم كه: بكر أفندى، اوننجى سوزى طبع ايتدى. إعجازِ قرآنه دائر يگرمى بشنجى سوزى يڭى حروف چيقمه‌دن طبع ايتمك ايچون اوڭا گوندردك. اوننجى سوزڭ مطبعه فيآتنى گوندرديگمز گبى، اونى ده گوندره‌جگز دييه يازدق. بكر أفندى، بنم فقرِ حالمى دوشونوب مطبعه فيآتى درت يوز بانقنوط قدر اولديغنى ملاحظه ايده‌رك و كندى كيسه‌سندن ويرمك، بلكه خواجه راضى اولماز دييه اونڭ نفسى اونى آلداتدى. طبع ايديلمدى. خدمتِ قرآنيه‌يه مهمّ بر ضرر اولدى. ايكى آى صوڭره طوقوز يوز ليرا خيرسزلرڭ ألنه گچدى. شفقتلى و شدّتلى بر طوقات يدى. إن شاء اﷲ ضياعه گيدن طوقوز يوز ليرا، صدقه حكمنه گچدى.

------------------------------------------------------------
حاشيه : توافق معجزه‌سنى گوسترر بر صورتده ديمكدر