ايشته هم اوڭا، هم رسالة النوره چوق علاقه‌سى بولونان بو بيڭ اوچ يوز اون آلتى (١٣١٦) تاريخنه چوق آيتلر متّفقًا باقارلر. مثلا: ناصلكه {هَدٰينِى رَبِّى اِلٰى صِرَاطٍ مُسْتَقِيمٍ} آيتى تام تامنه توافقله إشارت ايدر. عينًا اويله ده؛ بر آيتِ مشهوره اولان {اِنَّ رَبِّى عَلٰى صِرَاطٍ مُسْتَقِيمٍ} مقامِ جفريسى شدّه‌لى ”نون“ بر ”نون“ صاييلسه و تنوين صاييلمازسه بيڭ اوچ يوز اون آلتى ايده‌رك عينًا تام تامنه او تاريخه إشارت ايدر. هم ناصلكه يدى سكز سوره‌لرده گلن آيتلر و او آيتلرده گلن ”صراط مستقيم“ جمله‌لرى رسالة النور إسمنه توافقله برابر، بو مذكور ايكى آيت گبى بر قسمى رسالة النور تأليفنڭ تاريخنى ده گوسترر. عينًا اويله ده؛ يدى عدد سوره‌لرڭ باشلرنده يدى دفعه {تِلْكَ اٰيَاتُ الْكِتَابِ} جملۀِ قدسيه‌سى مقامِ جفريسى اولان بيڭ اوچ يوز اون آلتى ويا يدى (١٣١٦-١٣١٧) ايده‌رك عينًا تام تامنه او بيڭ اوچ يوز اون آلتى تاريخنه توافقله إشارت ايتديگى گبى، {طٰس تِلْكَ اٰيَاتُ الْقُرْاٰنِ} آيتى دخى عينًا بيڭ اوچ يوز اون آلتى ايده‌رك او بيڭ اوچ يوز اون آلتى تاريخنه توافقله إشارت ايدر

گويا ناصلكه عصرِ سعادتده قرآنده‌كى ايمان حقيقتلرينه علامتلر، دليللر و او كتابِ مبينڭ دعوالرينه برهانلرى و حجّتلرى گوزلره ده گوسترمك معناسنده تكرار ايله {تِلْكَ اٰيَاتُ الْكِتَابِ ❊ تِلْكَ اٰيَاتُ الْكِتَابِ ❊ تِلْكَ اٰيَاتُ الْقُرْاٰنِ} فرمانلريله قرآنِ معجز البيان إعلانات ياپييور. اويله ده، بو دهشتلى عصرده دخى بر معناىِ إشاريسيله او آياتِ فرقانيه‌نڭ برهانلرى و حقّانيتنڭ علامتلرى و حقيقتلرينڭ حجّتلرى و حق كلام اﷲ اولديغنه دليللرى اولان رسائل النوره معناىِ إشاريسيله، علامت و برهان و أماره و دليل معناسيله آياتڭ آيتلرى دييه تكرار ايله {تِلْكَ اٰيَاتُ الْكِتَابِ} فرمان ايده‌رك نظرِ دقّتى قرآن حسابنه بو عصره و بو عصرده‌كى رسائل النوره چويرييور إعتقاد ايدييورم