رسالۀِ نورده قطعى و قوّتلى چوق برهانلر ايله إثبات ايديلمش كه: أگر وحدت و توحيد اولمازسه، بر چيچك، بر آغاج قدر، بلكه داها مشكلاتلى و بر آغاج، بر بهار قدر، بلكه داها صعوبتلى اولمقله برابر؛ قيمت و صنعتجه بتون بتون سقوط ايده‌جكلردى. و شيمدى بر دقيقه‌ده ياپيلان بر ذى‌حيات، بر سنه‌ده آنجق ياپيلاجقدى، بلكه ده هيچ ياپيلميه‌جقدى. ايشته بو مذكور سرّه بناءًدر كه: غايت مبذوليت و چوقلقله برابر غايت قيمتدار و غايت چابوق و قولايلقله برابر غايت صنعتلى اولان بو ميوه‌لر، بو چيچكلر، بو آغاجلر و حيوانجقلر منتظمًا ميدانه چيقييورلر و وظيفه باشنه گچييورلر و تسبيحاتلرينى ياپوب، بيتيروب، تخملرينى يرلرنده توكيل ايده‌رك گيدييورلر

ايكنجى سرّ: ناصلكه نورانيت و شفّافيت و إطاعت سرّيله و قدرتِ ذاتيه‌نڭ بر جلوه‌سيله بر تك گونش، بر تك آيينه‌يه ضيالى عكس ويرديگى گبى؛ حدسز آيينه‌لره و پارلاق شيلره و قطره‌لره او قيدسز قدرتنڭ گنيش فعاليتندن ضيالى و حرارتلى اولان عينِ عكسنى أمرِ إلٰهى ايله قولايجه ويره‌بيلير. آز و چوق بردر، فرقى يوقدر

هم بر تك كلمه سويلنسه، نهايتسز خلاّقيتڭ نهايتسز وسعتندن، او بر تك كلمه بر تك آدمڭ قولاغنه زحمتسز گيرديگى گبى، بر ميليون قولاقلرڭ قفالرينه ده إذنِ ربّانى ايله زحمتسز گيرر. بيڭلرله ديڭله‌ين ايله بر تك ديڭله‌ين مساويدر، فرق ايتمز. هم گوز گبى بر تك نور ويا جبرائيل گبى نورانى بر تك روحانى؛ تجلّئِ رحمت ايچنده اولان فعاليتِ ربّانيه‌نڭ كمالِ وسعتندن بر تك يره سهولتله باقديغى و گيتديگى و بر تك يرده سهولتله بولونديغى گبى، بيڭلر يرلرده ده، قدرتِ إلٰهيه ايله سهولتله بولونور، باقار، گيرر.. آز، چوق فرقى يوقدر